الماتى قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسىنا قاراستى بەلسەندى ۇزاق ءومىر ءسۇرۋ ورتالىعىندا ەگدە جاستاعى ازاماتتاردى الاياقتىق ارەكەتتەردەن قورعاۋعا باعىتتالعان «الاياقتىق: ءوزىڭىزدى جانە جاقىندارىڭىزدى قالاي قورعاۋعا بولادى» تاقىرىبىندا ءدارىس ۇيىمداستىرىلدى.
دارىسكە شامامەن 40 ادام قاتىستى. ءىس-شارانىڭ ماقساتى – ەگدە جاستاعى ازاماتتاردىڭ قارجىلىق ساۋاتىن ارتتىرۋ، اقپاراتتاندىرۋ دەڭگەيىن كوتەرۋ جانە سوڭعى ۋاقىتتا ارتىپ وتىرعان قارجىلىق الاياقتىققا بايلانىستى قۇقىقبۇزۋشىلىقتاردىڭ الدىن الۋ.
كەزدەسۋ بارىسىندا الماتى قالاسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ اسا ماڭىزدى ىستەر جونىندەگى جەدەل ۋاكىلى مىرزاحان جاقسىلىق، سونداي-اق پوليسيا پولكوۆنيگى، زەينەتكەر راحيموۆ باۋىرجان سارين ۇلى بايانداما جاسادى. سپيكەرلەر الاياقتار قولداناتىن قازىرگى تاسىلدەر مەن سحەمالار تۋرالى ايتىپ، ەڭ ءجيى كەزدەسەتىن الداۋ تۇرلەرىنە توقتالىپ، جەكە قاراجات پەن قۇپيا دەرەكتەردى قورعاۋعا قاتىستى كەڭەس بەردى.
كەزدەسۋ بارىسىندا ەگدە جاستاعى ادامداردىڭ الاياقتاردىڭ قۇربانىنا ءجيى اينالۋىنىڭ سەبەپتەرى اتاپ ءوتىلدى. اتاپ ايتقاندا، بۇل شامادان تىس سەنگىشتىك، سيفرلىق ساۋاتتىڭ تومەندىگى جانە تەكسەرىلگەن اقپاراتقا قولجەتىمدىلىكتىڭ شەكتەۋلىلىگى.
سونىمەن قاتار، الاياقتاردىڭ بانك قىزمەتكەرلەرى، قۇقىق قورعاۋ ورگاندارىنىڭ وكىلدەرى نەمەسە تانىس ادام رەتىندە تانىستىرىپ، جالعان وتەماقى، ءتيىمدى نەسيە نەمەسە ينۆەستيسيا ۇسىناتىنى ءتۇسىندىرىلدى. بايلانىس ۇيالى جانە قالالىق تەلەفوندار، سونداي-اق مەسسەندجەرلەر ارقىلى جۇزەگە اسادى. مۇنداي جاعدايدا ازاماتتاردى اقشا اۋدارۋعا، بوگدە قوسىمشالاردى ورناتۋعا نەمەسە SMS ارقىلى كەلگەن كودتاردى ايتۋعا يتەرمەلەيدى.
كەزدەسۋ بارىسىندا ءبىر قاراپايىم، ءبىراق ماڭىزدى قاعيدا تاعى ءبىر مارتە ايقىندالدى: «اقپاراتتى بىلەتىن ادام – الدانبايدى». وسىنداي ءدارىس وتكىزۋ ەگدە جاستاعى ازاماتتاردىڭ قارجىلىق قاۋىپسىزدىگىن قامتاماسىز ەتۋدە جانە الاياقتىقتان قورعاۋدا ماڭىزدى ءرول اتقارادى.