2026 جىلعى 5 اقپاندا ساعات 20:30 شاماسىندا الاتاۋ قالاسىنىڭ زارەچنىي شاعىناۋدانىندا، №20 كوپقاباتتى تۇرعىن ءۇيدىڭ ەكىنشى قاباتىنداعى پاتەردە ءورت شىقتى.
وسى ۋاقىتتا قازاقستان رەسپۋبليكاسى ۇلتتىق ۇلانىنىڭ 3660 اسكەري ءبولىمىنىڭ اسكەري قىزمەتشىلەرى – اعا لەيتەنانت ەربول ارىستانوۆ، سەرجانت باۋىرجان جايدارين جانە ەفرەيتور نۇرجان بەكبولاتوۆ قىزمەتتەن كەيىن ۇيلەرىنە قايتىپ بارا جاتقان. ولار پاتەردەن قويۋ ءتۇتىن شىعىپ جاتقانىن بايقاپ، دەرەۋ 101 جانە 103 قىزمەتتەرىنە حابار بەرگەن، سودان كەيىن تۇرعىنداردى ەۆاكۋاسيالاۋعا كىرىسكەن.
اسكەري قىزمەتشىلەر جەدەل ارەكەت ەتىپ، پودەزدەن شامامەن 20 بالانى، بىرنەشە ايەلدى، سونداي-اق مۇمكىندىگى شەكتەۋلى ازاماتتاردى ءقاۋىپسىز جەرگە شىعارعان. اسىرەسە بەسىنشى قاباتتاعى جاعداي ەرەكشە ءقاۋىپتى بولدى. وندا سىرتىنان قۇلىپتالىپ قالعان پاتەردە ءۇش كامەلەتكە تولماعان بالا بولعان. قاتتى ءتۇتىن مەن كومىرقىشقىل گازىنان ۋلانۋ قاۋپىنە قاراماستان، اسكەري قىزمەتشىلەر جوعارعى قاباتقا كوتەرىلىپ، تازا اۋانىڭ كەلۋىن قامتاماسىز ەتىپ، ەسىكتى بۇزىپ، بالالاردى امان الىپ شىقتى.
- ەكىنشى قاباتتاعى پاتەردىڭ تەرەزەسىنەن جالىن مەن قويۋ قارا ءتۇتىن شىققانىن كورىپ، ەڭ الدىمەن تۇرعىندارعا كومەكتەسۋگە تىرىستىق. ولاردىڭ اراسىندا كىشكەنتاي بالالار مەن قارت ادامدار كوپ بولدى. پودەزد قاتتى تۇتىنگە تولىپ، تىنىس الۋ مەن باعدار الۋ قيىنعا سوقتى، سوندىقتان ولار وزدىگىنەن عيماراتتان شىعا المادى، – دەدى اعا لەيتەنانت ەربول ارىستانوۆ.
وقيعا ورنىنا كەلگەن ءورت ءسوندىرۋ قىزمەتىنىڭ قىزمەتكەرلەرى ءورتتى سوندىرۋگە دەرەۋ كىرىستى. وبلىستىق تجد ءورت سوندىرۋشىلەرىنىڭ كۇشىمەن ءورت تولىقتاي اۋىزدىقتالدى. وقيعانىڭ ءمان-جايى انىقتالۋدا.
ۇلتتىق ۇلان اسكەري قىزمەتشىلەرىنىڭ جەدەل ءارى باتىل ارەكەتتەرىنىڭ ارقاسىندا كوپتەگەن ادامداردىڭ ءومىرى ساقتالىپ قالدى. ولاردىڭ كاسىبي دايىندىعى مەن ازاماتتىق جاۋاپكەرشىلىگى ۇلتتىق ۇلانعا ءتان جوعارى رۋح پەن ەرلىكتىڭ ايقىن ۇلگىسى بولىپ تابىلادى.
قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىنىڭ باسپا ءسوز قىزمەتى