الماتى قالاسىنداعى دوستىق ۇيىندە قازاقستان جازۋشىلار وداعىنىڭ ۇيىمداستىرۋىمەن جاڭا كونستيتۋسيا جوباسىن تالقىلاۋعا ارنالعان مازمۇندى جيىن ءوتتى. باسقوسۋعا قازاقستان جازۋشىلار وداعى باسقارماسىنىڭ ءتوراعاسى مەرەكە قۇلكەنوۆ ءتوراعالىق ەتتى.
جيىنعا ەلىمىزدىڭ بەلگىلى قالامگەرلەرى مەن شىعارماشىلىق زيالى قاۋىم وكىلدەرى، قوعام قايراتكەرلەرى، سونداي-اق ق ر پارلامەنتى ءماجىلىسىنىڭ دەپۋتاتتارى مەن كونستيتۋسيالىق رەفورما جونىندەگى كوميسسيا مۇشەلەرى قاتىستى. اتاپ ايتقاندا، تالقىلاۋعا جاناربەك ءاشىمجان، ايدوس سارىم جانە انار فازىلجان قاتىسىپ، جاڭا كونستيتۋسيا جوباسىنىڭ تۇجىرىمدامالىق نەگىزدەرى مەن ونىڭ قوعامدىق ماڭىزى جونىندە ءوز وي-پىكىرلەرى مەن ۇسىنىستارىن ورتاعا سالدى.
كەزدەسۋدىڭ باستى ماقساتى – ەل تاعدىرىن ايقىندايتىن ماڭىزدى قۇقىقتىق قۇجاتقا قاتىستى شىعارماشىلىق زيالى قاۋىمنىڭ ۇستانىمىن جۇيەلەپ، قوعام نازارىنا ۇسىنۋ، سونداي-اق جاڭا كونستيتۋسيا جوباسىن جالپىۇلتتىق تالقىلاۋعا بەلسەندى تۇردە تارتۋ بولدى.
تالقىلاۋ بارىسىندا كونستيتۋسيالىق رەفورمانىڭ نەگىزگى باعىتتارى، جاڭا كونستيتۋسيا جوباسىندا قوعام، مادەنيەت پەن شىعارماشىلىق سالاسىنا قاتىستى كوزدەلگەن نورمالار، ازاماتتىق ينستيتۋتتاردىڭ ورنى مەن جاۋاپكەرشىلىگى توڭىرەگىندە مازمۇندى پىكىر الماسۋ ءوتتى.
قاتىسۋشىلار قۇقىقتىق رەفورمالاردىڭ ەل دامۋى ءۇشىن ستراتەگيالىق ماڭىزىن اتاپ ءوتىپ، ازاماتتاردىڭ قۇقىقتارى مەن بوستاندىقتارىن كەڭەيتۋ، ءسوز جانە شىعارماشىلىق ەركىندىگىن ينستيتۋسيونالدىق تۇرعىدا نىعايتۋ قاجەتتىگىن باسا ايتتى.
سونىمەن قاتار، شىعارماشىلىق قاۋىم وكىلدەرى جاڭا كونستيتۋسيانىڭ تەك قۇقىقتىق قۇجات قانا ەمەس، قوعامدىق سانانى جاڭعىرتاتىن، ادىلەتتىلىك پەن جاۋاپكەرشىلىك قاعيداتتارىن ورنىقتىراتىن رۋحاني نەگىز بولۋى ءتيىس ەكەنىن اتاپ ءوتتى.
تالقىلاۋ قورىتىندىسى بويىنشا جاڭا كونستيتۋسيا جوباسىنىڭ نەگىزگى باعىتتارى مەن ۇسىنىلعان رەفورمالارعا قاتىستى قاتىسۋشىلار تاراپىنان جالپى قولداۋ ءبىلدىرىلدى.
قازاقستان جازۋشىلار وداعىنىڭ باسپا ءسوز قىزمەتى.