الماتى قالاسىندا قوعامدىق كەڭىستىكتەردى كەشەندى كورىكتەندىرۋ باعدارلاماسى جۇزەگە اسىرىلىپ وتىر. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسى اكىمىنىڭ ورىنباسارى الماسحان سماتلايەۆ مالىمدەدى.
اكىم ورىنباسارىنىڭ ايتۋىنشا، قالادا ساياباقتاردى، جاعالاۋلاردى، كوشە مەن قوعامدىق كەڭىستىكتەردى جاڭارتۋ جۇمىستارى قالالىق ورتانىڭ ساپاسىنا قويىلاتىن ءبىرىڭعاي ستاندارتتاردى قالىپتاستىرۋ نەگىزىندە جۇيەلى تۇردە جۇرگىزىلىپ كەلەدى.
«مۇندا جەكەلەگەن شەشىمدەر تۋرالى ەمەس، ادامعا باعىتتالعان، ونىڭ قاۋىپسىزدىگىنە، جايلىلىعىنا جانە كۇندەلىكتى ءومىر ساپاسىنا باسىمدىق بەرەتىن كەشەندى كوزقاراس تۋرالى ءسوز بولىپ وتىر»، – دەدى الماسحان سماتلايەۆ.
نەگىزگى جوبالاردىڭ ءبىرى رەتىندە تۇڭعىش پرەزيدەنت ساياباعىن كەشەندى كورىكتەندىرۋ جوسپارلانعان. جوبا اياسىندا: كىرەبەرىس ايماقتار جاڭارتىلادى، باستى سۋبۇرقاق قايتا جاڭعىرتىلىپ، جىل بويى پايدالانۋعا بەيىمدەلەدى، بالالار مەن سپورت الاڭدارى سالىنادى، سەرۋەن باعىتتارى مەن دەمالىس ايماقتارى دامىتىلادى.
سونىمەن قاتار، ەسەنتاي وزەنىنىڭ جاعالاۋىن، باۋم توعايىن، گەولوگتار اللەياسىن، سونداي-اق «قاسبەتتەن قاسبەتكە دەيىن» قاعيداتى بويىنشا جۇزەگە اسىرىلىپ جاتقان كوشەلەردى كورىكتەندىرۋ جۇمىستارى جالعاسۋدا. بارلىق جوبا كورىكتەندىرۋ، كوگالداندىرۋ، جارىقتاندىرۋ جانە كەدەرگىسىز ورتا قالىپتاستىرۋدىڭ ءبىرىڭعاي ستاندارتتارىن ەسكەرە وتىرىپ ىسكە اسىرىلادى.
بريفينگ بارىسىندا قالالىق ەلەكتر كولىگىن دامىتۋ ماسەلەسى دە قوزعالدى. الماتى قالاسى اكىمىنىڭ ورىنباسارى تروللەيبۋس جەلىسىن جويۋعا قاتىستى ەشقانداي جوسپار جوق ەكەنىن ەرەكشە اتاپ ءوتتى.
«تروللەيبۋس كولىگى ەكولوگيالىق تازا، سەنىمدى ءارى الەۋمەتتىك ماڭىزى بار قوعامدىق كولىك ءتۇرى رەتىندە ساقتالادى. سوڭعى جىلدارى ونى دامىتۋعا ايتارلىقتاي قارجى سالىندى، ينفراقۇرىلىم جاڭارتىلىپ، جىلجىمالى قۇرام جاڭعىرتىلدى»، – دەدى الماسحان سماتلايەۆ.
قالاداعى ەكولوگيالىق احۋالدى ەسكەرە وتىرىپ، تروللەيبۋس جۇيەسىن ودان ءارى دامىتۋ، ونىڭ ىشىندە پايدالانۋ تيىمدىلىگىن ارتتىرۋ، ينفراقۇرىلىمدى جاڭارتۋ جانە زاماناۋي تەحنولوگيالىق شەشىمدەردى ەنگىزۋ ماسەلەلەرى قاراستىرىلىپ وتىر.
«ءبىزدىڭ مىندەت – ءتيىمدى جۇمىس ىستەپ تۇرعان شەشىمدەردەن باس تارتۋ ەمەس، ولاردى قالانىڭ جانە تۇرعىنداردىڭ ۇزاق مەرزىمدى مۇددەسىنە ساي دامىتۋ»، – دەدى اكىم ورىنباسارى.
بريفينگ قورىتىندىسىندا اۋقىمدى كورىكتەندىرۋ جۇمىستارى ۋاقىتشا قولايسىزدىقپەن قاتار جۇرەتىنى ايتىلدى. دەگەنمەن، بارلىق جۇمىس بەكىتىلگەن كەستەگە سايكەس، ۋچاسكەلەردى كەزەڭ-كەزەڭىمەن جابۋ جانە بالاما باعىتتاردى ۇيىمداستىرۋ ارقىلى جۇرگىزىلەدى.
«بۇل جوبالاردىڭ ناتيجەسى قالادا ۇزاق جىل بويى ساقتالادى. بۇل الماتىنىڭ ورنىقتى دامۋىنا جانە بولاشاعىنا سالىنعان ينۆەستيسيا»، – دەپ ءسوزىن تۇيىندەدى الماسحان سماتلايەۆ.