«قازاقستاندىق اتوم ەلەكتر ستانسيالارى» اق باس ديرەكتورى تيمۋر جانتيكين اەس-تىڭ بالقاش كولىنە كەرى اسەرى تۋرالى الىپقاشپا ءسوزدى جوققا شىعاردى
اتوم ەلەكتر ستانسياسىنىڭ بالقاش كولىنە كەرى اسەرى تۋرالى ايتىلىپ جۇرگەن الىپقاشپا سوزدەر شىندىققا جاناسپايدى. بۇل ماسەلە ەگجەي-تەگجەيلى قاراستىرىلدى، جانە اەس-كە قاجەتتى سۋ مولشەرى كولدىڭ تابيعي بۋلانۋىنان شامامەن 0،3%-دى قۇرايدى. بۇل كورسەتكىشتىڭ ءوزى اەس-تىڭ بالقاش كولىنە ايتارلىقتاي كەرى اسەرى جوق ەكەنىن كورسەتەدى.
قازىرگى ۋاقىتتا ەلىمىزدە ەلەكتر ەنەرگياسىنىڭ تاپشىلىعى بايقالىپ وتىر. وسى سەبەپتەن كوپتەگەن ينۆەستيسيالىق جوبالار جۇزەگە اسپاي وتىر. ينۆەستورلار بار، قارجى دا دايىن، الايدا ەلەكتر ەنەرگياسىنىڭ جەتىسپەۋشىلىگى ولاردىڭ ىسكە اسۋىن تەجەيدى. ەگەر ءبىز بازالىق ەلەكتر گەنەراسياسىن قامتاماسىز ەتسەك، ەلىمىزدىڭ ينۆەستيسيالىق تارتىمدىلىعى ايتارلىقتاي ارتار ەدى.
قازاقستاننىڭ ەنەرگيا جۇيەسى ءقازىر كومىرگە نەگىزدەلگەن، ءبىراق كليماتتىق وزگەرىستەرگە بايلانىستى بۇل ەنەرگيا كوزىن الماستىرۋ قاجەت. قازاقستان ءۇشىن اتوم ەنەرگەتيكاسى – ەڭ ءتيىمدى بالاما. ءبىزدىڭ ەلدە اتوم ينفراقۇرىلىمى جاقسى دامىعان، جانە بۇل سالا الەمدىك اۋقىمدا دا ستراتەگيالىق ماڭىزدى بولىپ تابىلادى. قازاقستاننىڭ اتوم ونەركاسىبى ەنەرگەتيكالىق قاۋىپسىزدىك پەن ەكونوميكالىق ءوسۋدى قامتاماسىز ەتۋ ءۇشىن ۇلكەن الەۋەتكە يە.
اەس سالۋ ارقىلى ءبىز ەلدىڭ ەنەرگەتيكالىق تاۋەلسىزدىگىن نىعايتىپ قانا قويماي، كومىرتەگى شىعارىندىلارىن ازايتىپ، ەكولوگيالىق تۇراقتىلىقتى قامتاماسىز ەتە الامىز. بۇل قادام ەلىمىزدىڭ كليماتتىق كۇن تارتىبىنە سايكەس كەلەدى جانە قازاقستاننىڭ جاھاندىق ەنەرگەتيكالىق نارىقتاعى ورنىن نىعايتا تۇسەدى.