بيىل الماتىنىڭ جاستارىن جۇمىسپەن قامتۋ ماقساتىندا ءبىراز جۇمىس قولعا الىندى. جىل باسىنان بەرى 21700 جاس جۇمىسقا الىنسا، ولاردىڭ 15700ء-ى تۇراقتى، 6000-ى ۋاقىتشا جۇمىسقا ورنالاسقان. سيفرلىق پلاتفورمالاردى دامىتىپ، قىسقا مەرزىمدى كۋرستاردى ىسكە قوسىپ، مانساپ جارمەڭكەلەرى، كوميۋنيتي-ورتالىقتار ارقىلى قولداۋ كورسەتىپ، جۇمىس بەرۋشىمەن ءوزارا ارەكەتتەستىكتىڭ جاڭا فورماسىن ەنگىزۋ ارقىلى قالا جاستاردىڭ جۇمىسپەن قامتىلىپ، قىزمەتتە وسۋىنە ىقپال ەتۋگە ەتۋگە باعىتتالعان تۇتاس ەكوجۇيە قالىپتاستىرىپ جاتىر. وڭىرلىك كوممۋنيكاسيالار قىزمەتىندە جاستار ساياساتى باسقارماسى باسشىسىنىڭ ورىنباسارى الماز كەڭەسباي وسىلاي دەدى.
ءقازىر الماتىدا 712،3 مىڭ جاس بار. ولاردىڭ 442،3 مىڭى جۇمىس ىستەيتىندەر دە، 280،7 مىڭى – ستۋدەنتتەر، شامامەن 80 مىڭى جوعارى سىنىپ وقۋشىسى. ەكونوميكالىق بەلسەندى جاستاردىڭ سانى – 472،1 مىڭ ادام، ونىڭ ىشىندە 452،6 مىڭى جۇمىسپەن قامتىلعان. ولاردىڭ 396،7 مىڭى جالدامالى جۇمىسشىلار بولسا، 56 مىڭى ءوزىن-وزى جۇمىسپەن قامتىعاندار.
«NEET-جاستاردىڭ ۇلەسى قازىرگى ۋاقىتتا 5،8%. جىل سايىن جوعارى وقۋ ورىندارىن شامامەن 50 مىڭ ادام بىتىرەدى. ولاردىڭ 60–80%-ى الماتىدا قالىپ، وسىندا جۇمىسقا ورنالاسۋعا ۇمتىلادى»، – دەيدى الماز كەڭەسباي.
قالالىق كارەرا ورتالىعى - جاستاردى جۇمىسپەن قامتۋمەن اينالىسادى. جىل باسىنان بەرى ورتالىققا 5 مىڭنان استام جاس جۇگىنىپتى. 4 مىڭ ادام جۇمىسقا ورنالاسىپ، قالا اۋداندارىندا «كارەرا كۇندەرى» وتكەن. ءىس-شاراعا 18 مىڭ جاس قاتىسىپ، 1،7 مىڭى جۇمىس تاپقان. «جاسىل ەل» جوباسى بويىنشا دا جاز مەزگىلىندە 2،1 مىڭ ستۋدەنت ۋاقىتشا جۇمىسپەن قامتىلدى.
ماسەلەنىڭ شەشىلۋىنە JasAlmaty.kz سيفرلىق پورتالى ۇلكەن ۇلەس قوستى. بۇل پورتال Jobfair365 پەن SkillBridge پلاتفورماسىن قامتيدى. پورتالدا 3،5 مىڭنان استام جۇمىس بەرۋشى تىركەلگەن، 2،1 مىڭنان استام بوس جۇمىس ورنى بار، قولدانۋشىلار سانى 35 مىڭنان استى. وسى پلاتفورما ارقىلى 1،8 مىڭ ادام جۇمىس تاپتى. ولاردىڭ 82%-ى جوعارى ءبىلىمدى بولعانىمەن، 91%-ىنىڭ تاجىريبەسى جوق، بۇل باستاپقى جۇمىسپەن قامتۋدىڭ ماڭىزدىلىعىن كورسەتەدى.
SkillBridge باعدارلاماسى اياسىندا 61 ونلاين كۋرس ىسكە قوسىلىپ، 7،2 مىڭ جاس ءبىلىم الدى. كۋرستان كەيىن 3،8 مىڭ ادام جۇمىسقا ورنالاستى. كۋرستار سيفرلىق ماماندىقتارمەن قاتار (Digital ماركەتينگ، Java Pro، Web-اناليتيكا)، پراكتيكالىق باعىتتى دا قامتيدى. شىلدە ايىنان باستاپ «Skill All» جوباسى – قولدانبالى داعدىلارعا ارنالعان وفلاين وقىتۋ ىسكە قوسىلىپ، 800-دەن استام ادام ءتالىم الدى. جىل سوڭىنا دەيىن 2000 ادامدى قامتۋ جوسپارلانعان. سونىمەن قاتار، جۇمىسشى ماماندىقتارى تۋرالى «Qadam» ينستا-سەريالى 100 مىڭنان استام قارالىم جينادى. Skill All كۋرستارىنىڭ اتلاسى Python-نان باستاپ SMM جانە ChatGPT-گە دەيىن 18 باعىت بويىنشا جارىق كوردى.
الماتىداعى 11 جاستار كوميۋنيتي-ورتالىعى جۇمىسپەن قامتىپ، قولداپ، دامۋعا سەپتەسەتىن ورىنعا اينالدى. جىل باسىنان بەرى بۇل ورتالىقتارعا 6 مىڭنان استام جاس جۇگىندى: 3،9 مىڭى جۇمىس ماسەلەسى بويىنشا، 2،1 مىڭى – پسيحولوگيالىق جانە قۇقىقتىق كومەك الۋ ءۇشىن. 9 اي ىشىندە 1،5 مىڭنان استام ءىس-شارا وتكىزىلىپ، 200 مىڭنان استام ادام جۇمىسقا ورنالاسقان.
سونىمەن قاتار، الماتى قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسىمەن بىرلەسىپ، جاستاردى جۇمىسپەن قامتۋعا جاردەمدەسۋ بويىنشا كەشەندى جۇمىس جۇرگىزىلىپ جاتىر.
اتالعان جۇمىس اياسىندا ەڭبەك موبيلدىلىگى ورتالىعى ارقىلى تۇراقتى جانە ۋاقىتشا جۇمىسقا 8،4 مىڭ جاس جۇمىسقا ورنالاستى.
بۇدان بولەك، الماتى قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسى جاستاردى كاسىبي باعىتتاۋ ماقساتىندا «مانساپ كومپاسى» سيفرلىق پلاتفورماسىن ەنگىزىپ، دامىتىپ جاتىر. ناتيجەسىندە اتالعان پلاتفورما ارقىلى 3،7 مىڭ ادام جۇمىسپەن قامتىلدى.
وسىلايشا، جىل باسىنان بەرى جالپى 21،7 مىڭ جاس جۇمىسقا تۇردى. ونىڭ ىشىندە 15،7 مىڭى تۇراقتى، 6 مىڭى ۋاقىتشا جۇمىسقا ورنالاسقان.
جاستاردىڭ جۇمىسقا ورنالاسۋىنا كەدەرگى كەلتىرەتىن ماسەلەلەردى شەشۋ (تاجىريبەنىڭ بولماۋى، اقپاراتتىڭ جەتكىلىكسىزدىگى، جۇمىس بەرۋشىمەن بايلانىستىڭ جوقتىعى) ءۇشىن جاڭا فورماتتار ەنگىزىلە باستادى. جازدا «New Generation Leaders» اتتى العاشقى كارەرالىق وليمپيادا ءوتىپ، وعان 3 مىڭنان استام ستۋدەنت قاتىسىپ، 70 كوماندا 350-دەن استام شەشىم ازىرلەدى. سونىڭ ارقاسىندا 200 ادام جۇمىس تاۋىپ، 700ء-ى بىلىكتىلىگىن جەتىلدىردى.
سونداي-اق، جۇمىسسىز تۇلەكتەردى تىركەپ، ولاردى قالالىق كارەرا ورتالىعىنا باعىتتاۋ ءۇشىن call-ورتالىق تا قۇرىلدى. جاستاردى اقپاراتتاندىرۋ ماقساتىندا ميب جانە پيك-پەن (وسي ي كسك) قىرۋار جۇمىس ىستەلىپ جاتىر، بۇل كوميۋنيتي-ورتالىقتارعا كەلەتىندەر سانىن جىلىنا 400 مىڭنان 600 مىڭ ادامعا دەيىن ارتتىرۋعا مۇمكىندىك بەرمەك.
جاڭادان Career Speed Dating فورماتى دا ەنگىزىلدى. مۇندا جاستار ءوزىن تانىستىرىپ، كومپانيالار سول جەردە وزىنە كەرەك ماماندى تاڭداپ الادى. ءار كوميۋنيتي-ورتالىقتا 5–10 سەرىكتەس جۇمىس بەرۋشى ورنالاسادى. ولار كەڭەس بەرىپ، جۇمىسقا الىپ، جاستاردى ەڭبەك نارىعىنا بەيىمدەۋگە كومەكتەسپەك.
ءار جاستىڭ اقپارات، ءبىلىم الىپ، جۇمىسقا ورنالاسۋىنا مۇمكىندىك بەرەتىن جۇيە قالىپتاستىرۋ ارقىلى الماتى جاستاردى جۇمىسپەن قامتۋدى قالالىق ساياساتتاعى ستراتەگيالىق مىندەتكە اينالدىرىپ وتىر.