قازاق قوعامىندا انانىڭ بالاعا دەگەن ماحابباتى ايرىقشا باعالانادى. اسىرەسە ۇل بالا اۋلەتتىڭ جالعاسى، تىرەگى دەپ سانالاتىندىقتان، وعان دەگەن ىقىلاس تا ەرەكشە بولادى. دەگەنمەن، وسى شەكتەن تىس قامقورلىق كەيدە ەر ازاماتتىڭ تولىققاندى تۇلعا بولىپ قالىپتاسۋىنا كەدەرگى كەلتىرەدى. بۇل قۇبىلىستى كۇندەلىكتى تىلدە "ماماسىنىڭ بالاسى" دەپ اتايمىز. پسيحولوگ، گەشتالت-تەراپيەۆت ۇلمەكەن ساندىبەك قىزى اqshamnews.kz تىلشىسىنە وسى تاقىرىپتى تارقاتىپ بەردى.
"ماماسىنىڭ بالالارى" قايدان شىعادى؟
پسيحولوگ ۇلمەكەن ساندىبەك قىزى ءبىز اۋىزەكى تىلدە قولدانىپ جۇرگەن "ماماسىنىڭ بالاسى" ۇعىمىن پسيحولوگيالىق تىلمەن ءتۇسىندىرىپ بەردى.
"پسيحولوگيادا "ماماسىنىڭ بالاسى" قۇبىلىسى ەموسيالىق تاۋەلدىلىك، سيمبيوزدىق بايلانىس نەمەسە ينفانتيلدىلىك دەپ اتالادى. ول كوبىنە انانىڭ شامادان تىس قامقورلىعىنان، شەكارانىڭ بولماۋىنان جانە بالانىڭ ءوز بەتىنشە ءومىر سۇرۋىنە مۇمكىندىك بەرىلمەۋىنەن قالىپتاسادى"، - دەيدى مامان.
"بالاما جاقسى بولسىن" دەگەن نيەتتىڭ كولەڭكەلى تۇسى قانداي؟
ۇلمەكەن ساندىبەك قىزى انالار كوپ جاعدايدا بالالارىنا كىشكەنتايىنان شەكتەن تىس قامقورلىق تانىتىپ، ونى قالاي وزىنە تاۋەلدى ەتىپ العانىن بايقاماي قالاتىنىن ايتتى.
"انانىڭ شامادان تىس قامقورلىعى بالانىڭ وزبەتىنشە ءومىر ءسۇرۋىن، جاۋاپكەرشىلىگىن، وزىنە سەنىمىن السىرەتىپ، ەرەسەك ومىرگە بەيىمدەلۋىن قيىنداتادى. انا مۇنى بايقاماي قالادى. سەبەبى ءبارىن "بالاما جاقسى بولسىن" دەگەن نيەتپەن جاسايدى"، - دەيدى پسيحولوگ.
ونىڭ ايتۋىنشا، مۇنداي بالالار ومىردە ءجيى قيىندىق كورەدى:
"اناسى بۇل دۇنيەدەن وتكەندە، ولار اۋىر قايعىنى كوتەرە الماي، ىشكىلىككە، ويىنقۇمارلىققا نەمەسە ەسىرتكىگە تاۋەلدى بولىپ كەتەتىن جاعدايلار از ەمەس. اناسىنىڭ قامقورلىعىنا، شەشىمدەرىن ماقۇلداۋعا ۇيرەنىپ قالادى. ال ونىڭ ەرەسەك ومىردەگى سالدارى كوبەيە بەرەدى"، - دەيدى مامان.
"ماماسىنىڭ بالالارى" اناسىنىڭ رولىندە جۇرەتىن قىزدى تاڭدايدى"
پسيحولوگتىڭ ايتۋىنشا، اناسىنىڭ قامقورلىعىنا ۇيرەنىپ قالعان بالالار ۇيلەنسە دە، اناسىنا ۇقسايتىن، سونداي قامقورلىق بەرىپ وتىراتىن قىزدى تاڭدايدى.
"مۇنداي بالالار دوستىقتا دا، ماحابباتتا دا، جۇمىستا دا تاۋەلدى بولىپ قالادى. شەشىم قابىلداۋدا قينالادى، كوبىنە اناسىنىڭ ماقۇلداعانىن كۇتىپ وتىرادى. ءتىپتى ۇيلەنگەن جاعدايدا دا اناسىنىڭ رولىندە جۇرەتىن قىزدى تاڭدايدى. ءتىپتى كەيبىرى ەرەسەك شاقتا وزبەتىنشە ءومىر سۇرە الماي اتا-اناسىمەن بىرگە تۇرىپ، جەكە وتباسى قۇرۋعا ۇمتىلماۋى مۇمكىن"، - دەيدى ول.
پسيحولوگ كەڭەسى: سەپاراسيا نە ءۇشىن ماڭىزدى؟
ۇلمەكەن ساندىبەك قىزى اتا-انالارعا بالالارىنا سەپاراسيا جاساۋ، ياعني وزىنەن جىراقتا ءومىر ءسۇرىپ كورۋگە مۇمكىندىك بەرۋدىڭ ماڭىزدى ەكەنىن اتاپ ءوتتى.
"سەپاراسيا مىندەتتى، ول ەكەۋىن الىستاتۋ ەمەس، كەرىسىنشە ەكەۋىن دە نىعايتۋ. بالانى ەرتە باستان شەشىم قابىلداۋعا ۇيرەتىپ، جاۋاپكەرشىلىك بەرىپ، شەكارا قويۋ كەرەك. ءومىرىڭىزدى باسقا قىزىقتى بوياۋلارمەن تولتىرۋعا ارناڭىز. بالاڭىزدىڭ ومىردە مۇمكىندىككە تولى ءومىرىن بايقاپ كورۋىنە ەرىك بەرىڭىز"، - دەپ قوستى مامان.
ول وسى ماسەلەگە قينالىپ جۇرگەن اتا-انالارعا ۆەرونيكا حلەبوۆا مەن مەلودي ءبيتتيدىڭ ەڭبەكتەرىن وقۋعا ۇسىنادى.
انانىڭ قىزعانىشى قايدان تۋادى؟
قازاق قوعامىندا كەي انالار ۇلدارىن ءتىپتى كەلىنىنەن قىزعانىپ جاتادى. بۇل جاعداي كوپ ۇرىسقا، كەلىسپەۋشىلىككە اكەلىپ سوعادى. پسيحولوگ مۇنداي جايتتاردا نە ىستەۋ كەرەگىن دە قوسا كەتتى.
"انالار ۇلىن تىرەك كورگەندىكتەن كەلىنىن قابىلداي الماي قىزعانىش تانىتادى. كوبىندە ءوزى سانالى تۇردە تۇسىنبەسە دە، بەيسانالى تۇردە كورىنىس بەرەدى. ونىڭ شەشىمى – ۇلىنا ەركىندىك بەرۋ، ال انا ءوز ءومىرىن تولىققاندى ەتىپ، ەنەرگياسىن وزىنە باعىتتاۋ. ال اناسىنا تاۋەلدى ەرلەرگە "تەك جەكە جاۋاپكەرشىلىكتى دامىتىپ، ءوز "مەنىن" قالىپتاستىرۋعا باسا نازار اۋدارۋ قاجەت"، - دەيدى ۇلمەكەن ساندىبەك قىزى.
ەسكە سالايىق، بۇعان دەيىن دەپۋتات ارداق نازاروۆ ماجىلىستە اناسىن تۋعان كۇنىمەن قۇتتىقتاپ، سىنعا قالعان ەدى. ال وعان دەيىن پاريج وليمپياداسىنىڭ چەمپيونى ەلدوس سمەتوۆ تە "ماماسىنىڭ بالاسى" دەگەن جەلەۋگە ۇشىراپ، جۇرتقا جاقپاي قالعان بولاتىن.