مەملەكەتتىك كىرىستەر كوميتەتى اۋديت دەپارتامەنتى بەرەشەكپەن جۇمىس باسقارماسىنىڭ باسشىسى ارىن قايساردىڭ سوزىنشە، جاڭا سالىق كودەكسىندە قارىزى بار كاسىپكەرلەردى بۇلتارتپاۋ شاراسى قولدانىلادى، دەپ حابارلايدى aqshamnews.kz
دەمەك، الداعى ۋاقىتتا 106 ميلليون تەڭگە بەرەشەگى بار بيزنەس وكىلدەرى شەتەلگە ساياحاتتاي المايدى. ءبىراق، ءبىر مۇمكىندىك تە جوق ەمەس.
– قولدانىستاعى زاڭناما بويىنشا زاڭدى تۇلعالار بىر-بىرىنە 45 ايلىق ەسەپتىك كورسەتكىشتەن (194 625 تەڭگەدەن) جوعارى مولشەردە قارىز بولعان جاعدايدا جەكە كاسىپكەرلەر مەن كومپانيانىڭ ءبىرىنشى باسشىلارىنا قازاقستاننان شىعۋعا شەكتەۋ قويىلادى. وسى نورماعا دا جاڭا سالىق كودەكسىندە وزگەرىس ەنگىزىپ وتىرمىز. دەپۋتاتتاردان دا سونداي ۇسىنىستار ءتۇستى. سونىڭ ءبارىن قاراستىرا كەلىپ، قارىز سوماسىن 27 اەك-كە دەيىن كوتەردىك. 106 ملن تەڭگەدەن جوعارى قارىزى بار جەكە كاسىپكەرلەر مەن زاڭدى تۇلعالاردىڭ ءبىرىنشى تۇلعالارى عانا قازاقستاننان شىعۋعا تىيىم سالىنادى، – دەدى ول.
دەي تۇرعانىمەن، بۇل شەكتەۋلەر سوتتىڭ سانكسياسى ارقىلى ىسكە اسپاق.
– بۇل شەكتەۋدى ۋاقىتشا توقتاتا تۇرۋ مۇمكىندىكتەرى دە قاراستىرىلعان. قارىزى بار تۇلعا شەتەلدە شۇعىل ەمدەلۋى كەرەك بولعان جاعدايدا شەكتەۋ قويىلمايدى. ءبىراق "ەمدەلۋگە جىبەرۋ كەرەك" دەگەن شەشىمدى سوت عانا قابىلداي الادى، – دەپ تولىقتىرا كەتتى ول.
ەل پرەزيدەنتى سوڭعى جولداۋىندا سالىق بەرەشەگى بارلاردىڭ بانكتەگى ەسەپ-شوتىن تولىق بۇعاتتاماۋدى تاپسىرعان ەدى.