الماتى قالاسىنىڭ اكىمى دارحان ساتىبالدى جەتىسۋ اۋدانىنداعى «Dragon City» تۇرعىن ءۇي كەشەنىنىڭ تۇرعىندارىمەن كەزدەستى. كەزدەسۋ بارىسىندا تۇرعىندار جەراستى تۇراعىن زاڭسىز قايتا ساتۋ، قازاندىقتىڭ جۇمىسى جانە جەراستى ءۇي-جايىندا ترانسفورماتورلى قوسالقى ستانسيانى ورنالاستىرۋ سياقتى ءبىرقاتار وزەكتى ماسەلەلەردى كوتەردى.
تۇرعىندار باستاپقى جوبا بويىنشا پاتەرلەر پاركينگپەن بىرگە ساتىلعانىن ايتتى. كەيىنىرەك شارتتار وزگەرىپ، كولىك ورىندارىنىڭ قۇنى 3-تەن 10 ميلليون تەڭگەگە دەيىن وسكەن، سودان كەيىن ءۇي-جايلار تولىعىمەن كوممەرسياعا اينالعان. تۇرعىنداردىڭ پىكىرىنشە، بۇل باستاپقىدا ويلاستىرىلعان سىزبا بولعان.
دارحان ساتىبالدى جاۋاپتى ورگاندارعا وسىنداي شەشىمدەردىڭ قالاي قابىلدانعانىن، كىم رۇقسات بەرىپ، قۇجاتتارعا كىم قول قويعانىن انىقتاۋدى تاپسىردى. ول بۇدان بىلاي بۇل ماسەلە ءوزىنىڭ جەكە باقىلاۋىندا بولاتىنىن ايتتى.
«ءىس-قيمىل الگوريتمى ەكونوميكالىق تەرگەۋ دەپارتامەنتىمەن، پروكۋراتۋرا، تج جانە باسقا دا قىزمەتتەرمەن بىرلەسىپ ازىرلەنەتىن بولادى. قاجەت بولسا، ترانسفورماتورلىق قوسالقى ستانسيانى اۋىستىرامىز. ەڭ باستىسى - كەشەننىڭ 2 جارىم مىڭعا جۋىق تۇرعىننىڭ قاۋىپسىزدىگى مەن ومىرىنە تونەتىن كەز كەلگەن قاتەردىڭ الدىن الۋ»، - دەدى اكىم.
قالا باسشىسى جىلىتۋ ماۋسىمىندا قازاندىققا قىزمەت كورسەتۋدى ۆەدومستۆولىق باعىنىستى ۇيىم ءوز موينىنا الاتىنىن اتاپ ءوتتى. ول قىستا ءۇزىلىسسىز جۇمىس ىستەۋىنە مۇمكىندىك بەرەتىنىن، ال كەلەسى جىلى نىسان بيۋدجەت ەسەبىنەن جاڭعىرتىلاتىنىن ايتتى.
اكىم ترانسفورماتورلى قوسالقى ستانسيانى جەراستى ءۇي-جايىنا ورنالاستىرۋعا قاتىستى الدىمەن قاۋىپسىزدىك شارالارىن پىسىقتاۋدى تاپسىردى.
تۇرعىندار اباتتاندىرۋ ماسەلەلەرىن دە كوتەردى. اكىمنىڭ تاپسىرماسى بويىنشا اۋداندا جول بەلگىلەرى، «كورىنبەيتىن پوليسەيلەر» جانە بەينەباقىلاۋ كامەراسى ورناتىلادى. بۇدان باسقا، «حالىق قاتىساتىن بيۋدجەت» باعدارلاماسىنىڭ تەتىگى ارقىلى بالالار ويىن الاڭىن سالۋ ماسەلەسى دە قارالادى.