الماتى قالاسىنىڭ كۇنىنە وراي اباي اتىنداعى قازاق ۇلتتىق وپەرا جانە بالەت تەاترى كونە كلاسسيكا مەن زاماناۋي ساحنانىڭ توعىسقان الەمىن پاش ەتەتىن «مۇرا» اتتى گالا-كونسەرتىن ۇسىنادى. بۇل شارا تەاتردىڭ 91ء-شى ماۋسىمىنىڭ اشىلۋى اياسىندا وتەدى جانە قالا تۇرعىندارىنا ەرەكشە اسەر قالدىراتىن جارىق شوۋىمەن ۇمىتىلماس كەش سىيلاماق. گالا-كونسەرت 15 قىركۇيەك كۇنى ساعات 19:00-دە تەاتر الاڭىندا وتەدى، دەپ حابارلايدى aqshamnews.kz
بۇل كەشتە ونەرسۇيەر قاۋىمدى قازاقستاننىڭ حالىق ءارتىسى نۇرجامال ۇسەنبايەۆا، قازاقستاننىڭ ەڭبەك سىڭىرگەن قايراتكەرلەرى ءجاميليا باسپاقوۆا مەن گۇلزات داۋىربايەۆا، «قۇرمەت» وردەنىنىڭ يەگەرى زارينا التىنبايەۆا، حالىقارالىق بايقاۋلاردىڭ جەڭىمپازدارى نۇرجان باجەكەنوۆ، فارحاد كۋبييەۆ پەن ۆەنەرا الپىسپايەۆا جانە تەاتردىڭ باسقا دا جۇلدىزدارى ءوز شەبەرلىكتەرىمەن قۋانتادى. گالا-كونسەرتتىڭ ديريجەرى — قازاقستاننىڭ ەڭبەك سىڭىرگەن قايراتكەرى نۇرجان بايبوسىنوۆ.
اباي اتىنداعى قازاق ۇلتتىق وپەرا جانە بالەت تەاترىنىڭ الاڭى بۇرىن-سوڭدى بولماعان ۇلكەن ساحناعا اينالادى. كونسەرت باعدارلاماسى ۇزدىك وپەرا جانە بالەت قويىلىمدارىنىڭ كورىنىستەرىمەن تولىقتىرىلادى. قوزعالمالى ساحنادا كورەرمەندەرگە سۇيىكتى اندەر مەن بيلەردەن شاشۋ شاشىلادى. جان تەبىرەنتەر گالا-كونسەرت ارقىلى اسقاق ونەردىڭ التىن مۇراسى قالا تۇرعىندارىنا تارتۋ ەتىلەدى.
اباي تەاترى ەلىمىزدەگى ەڭ ۇلكەن ونەر وشاعى رەتىندە ءوز ميسسياسىن ماقتانىشپەن جالعاستىرىپ كەلەدى. «باستى ماقساتىمىز — 90 جىلدان استام تاريحى بار كيەلى ساحنا مايتالماندارىنىڭ شەبەرلىگىن وسكەلەڭ ۇرپاققا ناسيحاتتاپ، جىلدار بويى قالىپتاسقان ادەمى ءداستۇردى زامان اعىمىنا ساي جاڭارتىپ، كورەرمەندەرمەن بايلانىستى ودان ءارى نىعايتۋ»، — دەپ اتاپ ءوتتى اباي اتىنداعى قازۇوبت ديرەكتورى اينۇر كوپباساروۆا.
تەاتر ۇجىمى جاڭا ماۋسىمىن اسەم اۋەندەر مەن كوز تارتارلىق شوۋمەن باستاماق. جارىق شوۋىن قويۋ ءۇشىن بەدەلدى «زولوتايا ماسكا» تەاتر سىيلىعىنىڭ يەگەرى، حالىقارالىق جوبالاردىڭ قاتىسۋشىسى، تانىمال جارىق قويۋشى سۋرەتشى تاتيانا ميشينا شاقىرىلدى. اباي اتىنداعى تەاتردىڭ شىعارماشىلىق ۇجىمى بارشا الماتى تۇرعىندارى مەن قوناقتارىن وسى ەرەكشە كەشكە شاقىرادى.
مەكەنجايى: اباي اتىنداعى قازاق ۇلتتىق وپەرا جانە بالەت تەاترى، الماتى ق.، قابانباي باتىر كوش.، 110. تەاتر الاڭى.