الماتى قالاسى مەن جەتىسۋ وبلىسىنا قاراستى قىلمىستىق-اتقارۋ جۇيەسى دەپارتامەنتىنىڭ №12 مەكەمەسىنە ەكسترەميزم مەن تەرروريزم ءۇشىن سوتتالعاندارمەن جۇمىس ىستەۋگە ارنالعان زاماناۋي تەحنيكالىق جابدىقتار تابىستالدى، دەپ حابارلايدى Aqshamnews.kz.
جابدىقتار بۇۇ-نىڭ ەسىرتكى جانە قىلمىس جونىندەگى باسقارماسى (ۋنپ وون) مەن اقش ەلشىلىگىنىڭ وكىلدەرى قاتىسقان ساپار اياسىندا بەرىلدى. دەلەگاسيا قۇرامىندا اقش ۇكىمەتىنىڭ تەرروريزمگە قارسى كۇرەس جونىندەگى بيۋروسىنىڭ ايماقتىق كەڭەسشىسى تەودور كرەيگ، اقش ەلشىلىگىنىڭ وكىلدەرى دجەرەمي اندەرسون مەن سەسيليا چو، سونداي-اق بۇۇ-نىڭ قازاقستانداعى باعدارلامالىق كەڭسەسىنىڭ باسشىسى مادينا سارييەۆا بولدى.
قازاقستان تاراپىنان قاجك ءتوراعاسىنىڭ ورىنباسارى جانيبەك بايماعانبەتوۆ، وپەراتيۆتىك باسقارما باستىعىنىڭ ورىنباسارى داۋلەت ابرايەۆ، رەجيم، قاداعالاۋ جانە كۇزەت باسقارماسى باستىعىنىڭ ورىنباسارى ەرجان ءجۇمادىلوۆ، ۋۆسپرسو-نىڭ باس مامان-پسيحولوگى ليۋدميلا يگناتەنكو جانە قاج دەپارتامەنتىنىڭ باستىعى رىسبەك تۇرعىمبايەۆ قاتىستى.
قاج كوميتەتىنىڭ مالىمەتىنشە، بۇل شارا قاۋىپسىزدىك دەڭگەيىن ارتتىرۋعا، الدىن الۋ جۇمىستارىنىڭ جاڭا تاسىلدەرىن ەنگىزۋگە جانە ەكسترەميستىك ءارى تەرروريستىك باعىتتاعى قىلمىس جاساعاندارمەن جۇمىس ىستەيتىن مامانداردى قولداۋعا باعىتتالعان.
– حالىقارالىق سەرىكتەستەرمەن وسىنداي ىنتىماقتاستىق قىلمىستىق-اتقارۋ جۇيەسىنىڭ الەۋەتىن ارتتىرىپ، ەكسترەميزمنىڭ الدىن الۋعا سەپتىگىن تيگىزەدى، – دەدى قاج كوميتەتى ءتوراعاسىنىڭ ورىنباسارى ج. بايماعانبەتوۆ.
بۇل جابدىقتاردىڭ تابىستالۋى – قازاقستاننىڭ قاۋىپسىزدىك پەن راديكالدانۋدىڭ الدىن الۋ سالاسىنداعى حالىقارالىق ۇيىمدارمەن ارىپتەستىگىنىڭ دامۋىنا جاسالعان تاعى ءبىر ناقتى قادام بولدى.