الماتىدا "حالىق قاتىساتىن بيۋدجەت" جوباسىنا ءوتىنىم قابىلداۋ جالعاسىپ وتىر. جوبانى "الماتى دامۋ ورتالىعى" اكسيونەرلىك قوعامى قولعا العان. وتىنىمدەر 2025 جىلى 30 قىركۇيەككە دەيىن قابىلدانادى.
بۇگىنگى تاڭدا قالا تۇرعىندارىنان 1 606 ۇسىنىس قابىلداندى. الماتىلىقتار اۋماقتى كوگالداندىرۋ، اۋلالار مەن قوعامدىق كەڭىستىكتەردى اباتتاندىرۋ، تروتۋارلار مەن ارىقتاردى جوندەۋ، بالالار جانە سپورت الاڭدارىن ورناتۋ، سونداي-اق سانيتارلىق ءتارتىپتى جاقسارتۋعا باعىتتالعان باستامالار ۇسىنعان.
ءوتىنىمدى ونلاين رەجيمدە budget.open-almaty.kz پلاتفورماسى ارقىلى بەرۋگە بولادى.
وتىنىمدە كورسەتىلۋى قاجەت:
• جوبانىڭ اتاۋى مەن قىسقاشا سيپاتتاماسى؛
• نىساننىڭ ناقتى مەكەنجايى؛
• فوتو نەمەسە ەسكيز؛
• شىعىننىڭ الدىن الا سمەتاسى.
قاتىسۋ شارتتارى:
• ءبىر ادام - ءبىر ءوتىنىم- ءبىر نىسان؛
• نىسان جالپىعا ورتاق جانە ءوتىنىش بەرۋشىنىڭ اۋدانىندا ورنالاسۋعا ءتيىس؛
• جوبادا ەڭ كوپ بيۋدجەت - 294،9 ملن تەڭگە.
ءوتىنىم قابىلداۋ اياقتالعاننان كەيىن بارلىق جوبا ساراپتامالىق كەڭەستەر مەن اۋدان اكىمدىكتەرىنىڭ قاراۋىنا جىبەرىلەدى. ەڭ كوپ داۋىس جيناعان باستامالار 2026 جىلى جۇزەگە اسىرىلادى.
"الماتى دامۋ ورتالىعى" اكسيونەرلىك قوعامى داۋىس بەرۋ بارىسى مەن قورىتىندىلارى، سونداي-اق، تاڭدالعان جوبالاردىڭ جۇزەگە اسىرىلۋى تۋرالى تۇرعىنداردى حاباردار ەتىپ وتىرادى.
قوسىمشا سۇراق تۋىنداسا تۇرعىندار اۋدان اكىمدىكتەرىنە نەمەسە Open Almaty قوعامدىق قابىلداۋىنا مىنا تەلەفون ارقىلى حابارلاسا الادى: 224 39 29 (ىشكى 203).