قازاق پەن جاپوننىڭ اۋىلى الىس بولعانىمەن كوڭىلى جاقىن. الماتىداعى مەملەكەتتىك ورتالىق مۋزەيدە ءوتىپ جاتقان «جاپونيا مادەنيەت كۇنى» سونى كورسەتكەندەي بولدى. مۋزەي قوناقتارىنا جاپون مادەنيەتىن جان-جاقتى تانىستىراتىن شارا ءقازىر دە مەملەكەتتىك ورتالىق مۋزەيدە ءوتىپ جاتىر دەپ حابارلايدى almaty-akshamy.kz.
ءتۇس الەتىندە باستالعان مادەني شاراعا جاپونيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى جۋن يامادا مىرزا دا ارنايى قاتىستى. ول شارانىڭ اشىلۋ سوزىندە «قازاقتار مەن جاپوندار مادەنيەت جاعىنان كوپ ورتاقتىققا يە باۋىرلار» دەپ اتادى.
«ءبىزدىڭ سىرت كەلبەتىمىز عانا ەمەس، وي-سانامىز بەن مادەنيەتىمىزدە دە كوپ ۇقساستىق بار ەكەنىن ءبىلىپ تاڭ قالدىم، ءارى تەرەڭ اسەر الدىم. بىلتىر جاپونيا مەن قازاقستان ديپلوماتيالىق بايلانىس ورناتقاندارىنىڭ 30 جىلدىعىن بىرگە اتاپ ءوتتى. جاپونيادا ءبىلىم الىپ جاتقان قازاقستاندىقتاردىڭ سانى جىلدان جىلعا ارتىپ كەلەدى. بۇل ءبىزدى قۋانتادى»، – دەدى ەلشى مىرزا.
شارانىڭ ماڭىزى مەن ءمانى جايىندا مەملەكەتتىك ورتالىق مۋزەي ديرەكتورى راشيدا حاريپوۆا حانىم ءوز پىكىرىمەن ءبولىسىپ، بىلاي دەيدى: «بىلەسىزدەر، وتكەن اپتادا ق ر مادەنيەت جانە اقپارات ءمينيسترى ايدا عالىم قىزى بالايەۆا جاپونيا ەلشىسىمەن كەزدەسكەن بولاتىن. سوندا قازاقسان مەن جاپونيا ورتاسىندا ەكونوميكالىق بايلانىستاردى عانا ەمەس، مادەني قارىم-قاتىناستى دا تەرەڭدەتۋ ماسەلەلەرىن كوتەرگەن ەدى. بۇگىنگى شارا سول كەزدەسۋدىڭ جۇزەگە اسىپ جاتقان يدەياسى دەۋگە بولادى. مۋزەيىمىزدە جاپون مادەنيەتى جان-جاقتى تانىستىرىلىپ جاتىر. كورۋشىلەردىڭ قاتارى مول. سەبەبى، ەكى حالىقتى شەكارالار ءبولىپ جاتقانىمەن، مادەنيەت جاعىندا جاقىندىعىمىز ايرىقشا».
ول، سونداي-اق، مەملەكەتتىك ورتالىق مۋزەي مۇنداي شارالاردى جىل سايىن وتكىزىپ تۇراتىنىن، ءتۇرلى ۋاقىتتا ءتۇرلى ەلدەردىڭ مادەنيەتىن تانىستىرۋ شارالارى وتەتىنىن دە جەتكىزدى. قازاقستاندا جاپون مادەنيەتىنە قىزىعۋشىلىقتىڭ جوعارى دەڭگەيدە ەكەنىن مۋزەي زالىنداعى كورەرمەن سانىنا قاراپ بىلۋگە بولادى.
اتاۋلى مادەني شارا اياسىندا مەملەكەتتىك ورتالىق مۋزەي عيماراتىنىڭ ءار بۇرىشىندا جاپون حالقىنىڭ تاعام، مادەنيەت، ۇلتتىق ونەرى، قولونەرى مەن جاۋىنگەرلىك ونەرىن تانىستىرۋعا ارنالعان كورمەلەر جۇمىس ىستەۋدە. بۇدان بولەك جاپوننىڭ دامىعان جاڭا تەحنولوگيالىق جەتىستىكتەرى، ءتىپتى ەلىمىزدە جوعارى ساتىلىمعا يە اۆتوكولىكتەرى دە كورمە الاڭىنان ورىن العان.