Ol julqa kóterýde 90, serpe kóterýde 123 kelini kóterdi.
Tokıo Olımpıadasynda aýyr atletıkadan áıellder arasynda 55 kelige deıingi salmaqta jeńimpazdar men júldegerler anyqtaldy. Qazaqstandyq Zúlfıa Chınshanlo qola medal jeńip aldy, dep habarlaıdy Almaty-akshamy.kz Olympic.kz saıtyna silteme jasap.
Qazaqstandyq sportshy qossaıys qorytyndysy boıynsha 213 kelini baǵyndyrdy. Ol julqa kóterýde 90, serpe kóterýde 123 kelini kóterdi.
Bul salmaqta altyn medaldi Fılıppın ókili Hıdılın Dıas (224 keli) enshilese, kúmisti qytaılyq Láo Kún (223 keli) ıelendi.
Osylaısha, Tokıo Olımpıadasyna attanǵan eki ziltemirshimiz de qola medal taǵyndy.
Jalpy esebi, Qazaqstanda úsh qola bar. Buǵan deıin Eldos Smetov (dzúdo) pen Igor Son (aýyr atletıka) úzdikter qatarynan kóringen bolatyn.