Premer-Mınıstrdiń orynbasary Tamara Dúısenovanyń basshylyǵymen ótken keńeste turmystyq zorlyq-zombylyq pen balalar men jasóspirimder arasyndaǵy býllıng máseleleri talqylandy, dep habarlaıdy almaty-akshamy.kz
Eske sala keteıik, Memleket basshysy Qasym-Jomart Toqaev Qazaqstan halqyna Joldaýynda Biryńǵaı senim telefonyn uıymdastyrý jáne zorlyq-zombylyq pen býllıng qurbandaryna kómek kórsetýdiń pármendi baǵdarlamasyn ázirleý mindetin qoıǵan bolatyn.
Osy tapsyrmany oryndaý aıasynda turmystyq zorlyq-zombylyq pen býllıng qurbandary 16 qazannan bastap 111 biryńǵaı memlekettik baılanys ortalyǵyna (buryn «AMANAT» partıasy janynda jumys istegen) táýlik boıy habarlasa alady. Qalalyq nómirler men uıaly baılanys operatorlary úshin qońyraý shalý tegin. Azamattarǵa qajetti kómek mátindik dıalog arqyly da kórsetiletin bolady.
Vıse-premer atap ótkendeı, baılanys ortalyǵyna úlken jaýapkershilik júktelgen. Júıeniń úılesimdi jumysy áıelder men balalarǵa qatysty zańsyz áreketterdiń teris saldarynynyń aldyn alyp, azamattarǵa jedel quqyqtyq, psıhologıalyq jáne konsýltasıalyq kómek kórsetýge múmkindik beredi.
Qıyn jaǵdaıǵa tap bolǵan qazaqstandyqtarǵa kómek kórsetý úshin bilikti psıhologtar men zańgerler tartyldy. Árbir jaǵdaı boıynsha operatorlar «dál osy sátte» qaǵıdatyn basshylyqqa ala otyryp, jekelegen másele boıynsha keshendi kómek kórsetetin bolady. Barlyq qajetti memlekettik organ men qyzmetti mindetti keri baılanys tásilin qoldana otyryp, bir mezgilde qosý kózdelgen.
«Atalǵan sharalar azamattar, ásirese áıelder men balalar úshin qaýipsiz jaǵdaı jasaýǵa múmkindik beredi. Baılanys ortalyǵy memlekettiń ýaqytyly kómek kórsetýiniń tıimdi quralyna aınalady, sondaı-aq óńirler boıynsha asa ótkir problemalarǵa monıtorıń jasaý úshin derekter kózi bolmaq», — dedi Tamara Dúısenova.
Biryńǵaı senim telefony memlekettik shuǵyl qyzmetter tizbesindegi 101, 102, 103 jáne t.b. nómirlerdiń qataryna engiziledi. Bul azamattarǵa quqyq buzýshylyqtar men qylmystardyń aldyn alý arqyly jedel túrde kómek kórsetýge múmkindik beredi.