Aqyn, Memlekettik syılyqtyń laýreaty, Qazaqstannyń eńbek sińirgen qaıratkeri, «Parasat» ordeniniń ıegeri Nesipbek Aıtuly qaıtys boldy. Bul týraly Qazaqstan Jazýshylar odaǵynyń Astana qalasy fılıalynyń dırektory, aqyn Dáýletkereı Kápuly áleýmettik jelide jazdy, dep habarlaıdy almaty-akshamy.kz.
Qosh, Nesaǵam. Qazaq poezıasynyń báıteregi qulady, - dep jazdy aqyn.
Nesipbek Aıtuly 1950 jyly Shyǵys Túrkistannyń Tarbaǵataı aımaǵynda týǵan. Aqyn eńbek jolyn Shubartaý aýdandyq «Jańa ómir» gazetinde bastaıdy. 1974 jyly Qazaq Memlekettik ýnıversıtetiniń jýrnalısıka fakúltetin bitirgen.
2001 jyldan bastap Astana qalasyna qonys aýdaryp, L.N.Gýmılev atyndaǵy Eýrazıa ulttyq ýnıversıtetinde, Prezıdent janyndaǵy Mádenıet ortalyǵynda qyzmet istegen.
Sońǵy qyzmeti – Astana qalasyndaǵy S.Seıfýllın atyndaǵy mýzeı dırektory.
Alǵashqy «Balalyq» degen óleńi 1965 jyly Shubartaý aýdandyq «Jańa ómir» gazetinde, alǵashqy toptamasy 1972 jyly Muqaǵalı Maqataevtyń sát sapar tileýimen «Lenınshil jas» gazetinde, alǵashqy kitaby 1974 jyly «Qozykósh» degen atpen jaryq kórdi. «Júrektegi jańǵyryqtar», «Áke týraly syr», «Jańbyr áni», «Túndelep ushqan tyrnalar», «Rýhymnyń padıshasy», «Muqaǵalı-Jeltoqsan», «Báıterek», balalarǵa arnalǵan «Balabaqshaǵa barar jolda», «Jelkildep ósken quraqtaı», «Kúmis kúıme» («Serebrányı sýndýchok»), «Qartaımaıdy kún nege?» atty kitaptary, Shyǵystyń uly shaıyry Á.Naýaıdyń «Eskendir qorǵany», «Láıli-Májin» dastandaryn tárjimalap, «Igor joryǵy týraly jyr», t.b. aýdarma kitaptary shyqqan. Túriktiń Vİİ ǵasyrda ómir súrgen uly aqyny Júnis Emire, qytaıdyń kóne dáýir aqyny Bo Syzúdyń, fransýz aqyny DJ.Rodarıdyń, sondaı-aq, M.Isakovskıı, A.Barto, S.Mıhalkov, S.Barýzdın, V.Berestov, T.Sydyqov, S.Jýsýev óleńderin týǵan tilimizde sóıletken.
«Báıterek»(2003), «Kóz jasym» tańdamaly (2006), «Bóritostaǵan» (2007), «Erlikke eskertkish»(2008), «Sardar»(2008), «Qulanoınaq»(2009), «Arqatirek»(2010), «Naýryzbaı»(2011), «Tý»(2012), «Saraıymnan shyqqan sóz»(2014), «Darıǵa, dáýren»(2018), t.b. kitaptary jaryq kórgen.