Bul joba áleýmettik jaǵynan osal toptardaǵy, ásirese, aýyldyq jerlerde turatyn jastardy qoldaý maqsatynda iske asyrylady.
Úkimettik emes uıymdarǵa granttar usyný jóninde konkýrs jarıalandy, dep habarlaıdy Almaty-akshamy.kz QazAqparatqa silteme jasap.
«Aqparat jáne qoǵamdyq damý mınıstrliginiń tapsyrysy boıynsha Azamattyq bastamalardy qoldaý ortalyǵy Zhas Project jobasyn iske asyrý maqsatynda qazaqstandyq ÚEU-dan ótinimderdi qabyldaýdy bastady. Bul joba Almaty, Qaraǵandy, Mańǵystaý, Túrkistan oblystarynda pılottyq rejımde, Úkimettiń 2022 jylǵa arnalǵan is-qımyl baǵdarlamasy aıasynda iske asyrylady», - delingen vedomstvo saıtynda.
Atalǵan óńirlerdiń árqaısysynda belgili bir jobany qarjylandyrýǵa 1 mln teńgeniń 63 shaǵyn granty bólinbek. Maqsat – áleýmettik osal toptardaǵy, ásirese, aýyldyq jerlerde turatyn jastardy óz eldi mekenderin áleýmettik-ekonomıkalyq turǵyda damytýǵa, ónimdi jumyspen qamtýǵa tartý, sondaı-aq jastardyń bıznes-ıdeıalaryn qoldaý.
ABQO basqarma tóraǵasynyń orynbasary Jasulan Bısembıevtiń aıtýynsha, birinshi kezeńde belgili bir óńirde jobany júzege asyratyn ÚEU tańdalmaq. Táýelsiz konkýrstyq komısıa ÚEU-nyń ótinimderin qaraý kezinde Almaty, Qaraǵandy, Mańǵystaý, Túrkistan oblystarynda áleýmettik jobalardy iske asyrý tájirıbesin eskeretin bolady.
Ekinshi kezeńde grantqa ıe bolǵan ÚEU qoǵam belsendilerinen, salalyq sarapshylar men kásipkerlerden turatyn óńirlik komısıalardy qurady. Olar ár jobanyń tıimdiligin saraptaýmen aınalysady. Granttar konkýrsyna ÚEU-dan ótinimderdi qabyldaý 17 maýsymǵa deıin jalǵasady.