Almatylyq naýqas ońaltý em-sharalarynyń arqasynda aıaqqa turdy. Dálirek aıtsaq, zembilmen jetkizilgen pasıent aýrýhanadan óz aıaǵymen shyqty. Iá, megapolıstegi №7 qalalyq klınıkalyq aýrýhananyń neıroreabılıtasıa bólimshesinde uzaq ýaqyt boıy medısınalyq ońaltýdan ótken 67 jastaǵy pasıent úshin búgin erekshe kún.
Klınıkanyń baspasóz qyzmeti habarlaǵandaı, qulap aýyr jaraqat alǵan zeınetkerge eki ret ota jasalǵan. Buǵan deıin reabılıtasıanyń eki kýrsynan ótipti. Ońaltý bólimine jetkizilgen kezde aıaq-qolynan ál ketip, qoldary semip, bulshyq et massasy 1,0 balǵa deıin tómendegen. Saldarynan qolyn kótere almaı qalǵan, ári bireýdiń súıemeldeýinsiz júrip-tura almaıtyn.
Aýrýhananyń neıroreabılıtasıa bólimshesi meńgerýshisi Aınur Dosybaevanyń aıtýynsha, pasıent ońaltýdyń 1-shi jáne 2-shi kýrstarynan ótip, densaýlyqty qalpyna keltirýge baǵyttalǵan em-sharalardy alǵan. Onda naýqastyń densaýlyq jaǵdaıyna qaraı derbes jáne keshendi ońaltý is-sharalary júrgizilgen.
«Árqaısysy 14 kúnnen turatyn eki kýrs barysynda pasıent kún saıyn kınezıoterapevpen jumys istedi, neıroreabılıtasıanyń PNF, Bobat terapıa syndy eń zamanaýı ádisterimen emdeldi. Sondaı-aq, arnaıy qondyrǵylar arqyly jattyǵyp, massaj, fızıoem qabyldady, eńbekke beıimdeldi. Nátıjesinde kúndelikti ómir súrýge qajetti daǵdylary qaıta oraldy», – deıdi reabılıtolog-dáriger.
Bólimshede mýltıdısıplınarlyq emdeý tásili qoldanylady. Kóptegen mamandardyń qatysýymen júrgiziletin em-dom pasıentti múgedektikten saqtap qalady jáne onyń qatarǵa qosylyp ketýine múmkindik beredi.
«Aýrýhanadan shyqqanǵa deıin aıaq-qolyndaǵy bulshyq etteri qataıyp, óz betimen júrip turatyn boldy, qolyn kóteredi, judyryǵyn ashyp-jumady. Endi ol reabılıtasıanyń 3-shi kezeńine joldandy. Emdi tirkelgen emhana arqyly alady», – deıdi Aınur Dosybaeva.
№7 aýrýhananyń neıroreabılıtasıa bólimshesi úsh jyldan beri jumys isteıdi. Munda mıdaǵy qan aınalymy buzylǵan pasıentter ońaltýdyń ekinshi kezeńinen ótedi jáne mı men julynǵa ota jasalady. Bul jerde emdelý úshin «Aýrýhanaǵa jatqyzý búrosy» arqyly kezekke turý qajet.
Bir aıta keterligi, medısınalyq saýyqtyrý men qalpyna keltirýge baǵyttalǵan em-dom MÁMS arqyly júrgiziledi. Ońaltýdan mıdaǵy qan aınalymy buzylǵan nemese operasıa jasatqan pasıentter alǵashqy 6 aı ishinde óte alady. Bıyl bólimshede 560 naýqas em qabyldaǵan. Onyń 70%-y ınsýlt alǵan pasıentter bolsa, 30%-y – túrli operasıalardan keıin kelgender.
– Reabılıtasıa bólimine kelgen kezde aýyr halde edim, aıaq-qolymdy qozǵaýdyń ózi muń boldy. Osynda alǵan emniń arqasynda aıaqqa turdym, kúnde 50 metrge deıin ózim júretin boldym. Óz qolyma ózim ıelik etip, jelkemdi, murnymdy qasyp, qasyq, kese degenderdi kóteretin halge jettim. Jazylyp kele jatqanyma kózim jetken soń, jigerlenip, úmitke senim qosyp, óz-ózime kele bastadym. Bólimshe meńgerýshisi Aınur Jıenbaıqyzy men nusqaýshy-maman Janasyl Rysbekulyna aıtar alǵysym sheksiz. Meniń aıaqqa turýyma osy kisilerdiń sińirgen eńbegi zor. Sonyń arqasynda ózimdi jaqsy sezinip, aıaq-qolyma jan bitti. Jetinshi aýrýhana qyzmetkerleriniń bárine de rızamyn, – almatylyq 67 jastaǵy turǵyn.