Másele Úkimette qaralyp jatyr
Soltústik Qazaqstan oblysyna jumys saparymen kelgen Eńbek jáne halyqty áleýmettik qorǵaý mınıstri Tamara Dúısenova qoǵamda jıi talqyǵa túsetin máselelerdiń biri – áıelderdiń zeınet jasyn qysqartýǵa qatysty pikir bildirdi, dep habarlaıdy Almaty-akshamy.kz QazAqparat-qa silteme jasap.
Mınıstrdiń aıtýynsha, áıelderdiń qazir 63 jasty kútpeı zeınet demalysyna shyǵýǵa múmkindigi bar. Eger 5 balasy bolsa, zań boıynsha 53 jasynda zeınetkerlikke shyǵa alady. Sondaı-aq, qoldanystaǵy zańnamaǵa sáıkes, eger de zeınetaqy qoryndaǵy jınaǵy jetetin bolsa, bıyl 51 jarym jasynda zeınetaqy ala alady.
«Búgin áıeldermen de kezdestik. Olar meniń, men olardyń usynysyn tyńdadym. Eń negizgi másele – biz qaı jasta zeınetke shyqsaq, zeınetaqymyz alyp júrgen eńbekaqymyzdyń kólemine sáıkes bolady?
Bizde 50 men 60 jas aralyǵyndaǵy 967 myńnan astam áıel bar. Solardyń 339 myńy búginde ekonomıkanyń barlyq salalarynda eńbek etip júr. Olardyń eńbekaqysy 170 myń teńgeden asady. Olarǵa 58 jasta zeınetke shyq dep aıtsaq, alatyn zeınetaqylary áldeqaıda tómen bolaıyn dep tur. Sebebi, biz yntymaqtastyrylǵan júıeden alatyn zeınetaqyny 1998 jylǵa deıingi eńbek ótilimen esepteımiz. Al, ol eńbek ótili qazir azaıyp qaldy. Sondyqtan, búgingi kezdesýde men áıelderge zeınetaqyny kóterý máselesin sheshý qajettigin aıttym, bul másele qazir Úkimette qaralyp jatyr», - deıdi Tamara Dúısenova.
Mınıstrdiń aıtýynsha, jumys istemeıtin áıelderge qatysty da másele bar. Olardyń zeınetaqysy tómengi kúnkóris deńgeıine de jetpeıdi.
«Áıelderdiń bul sanatyna tómen qoısaq ta, joǵary qoısaq ta, bıyl shyǵatyn bolsa 24 700 teńge kóleminde alady. Sondyqtan, bıyl Úkimet tarapynan «Kúmis jas» degen jańa bir joba bastaldy. Ony men mınıstrlikke kelgennen keıin qoldadym. 61 jastaǵy jandarǵa arnalǵan. 58 jastan bastap kóremiz, múmkin jumysqa tartamyz. Onda alatyn qarajatynyń kólemi 91 myń 500 teńge bolsa, endigi jyly 100 myńnan asady. Sóıtip, 5 jyldyq eńbek ótili jáne zeınetaqy jınaǵy paıda bolady», - deıdi QR Eńbek jáne halyqty áleýmettik qorǵaý mınıstri.
Tamara Dúısenovanyń aıtýynsha, zeınetaqyny kóterý máselesi qazir Úkimet tarapynan qoldaý taýyp jatyr, al zeınet jasyn azaıtý jan-jaqty qaralady. Jumys toby aıdyń sońynda taǵy bir kezdesedi.
«Taǵy da qaıtalap aıtamyn, bizdiń mindetimiz – zeınet jasyn tómendetip, az zeınetaqy alý emes, qaısy jasta shyqsaq ta, kúnkóris deńgeıine jetetin zeınetaqymen qamtamasyz etý máselesi birinshi turýy kerek», - dedi mınıstr.