Jemqorlyqqa qarsy úılestirilgen árekettermen kúresý kerek
«Almaty «ÁKK» AQ jáne aýyl sharýashylyǵyn sýbsıdıalaý qyzmetindegi sybaılas jemqorlyq táýekelderin syrtqy taldaý qorytyndylary talqylandy, dep habarlaıdy Almaty-akshamy.kz.
Almaty qalasy ákiminiń orynbasary Álisher Ábdiqadyrovtyń tóraǵalyǵymen Almaty qalasy Kásipkerlik jáne ınvestısıalar basqarmasy men onyń vedimistik baǵynysty uıymdarynyń qyzmetinde sybaılas jemqorlyqqa qarsy is-qımyl máseleleri boıynsha otyrys ótti.
İs-sharaǵa Almaty qalasynyń Sybaılas jemqorlyqqa qarsy qyzmetiniń basshylyǵy, qalanyń qoǵamdyq keńesiniń músheleri jáne mekeme qyzmetkerleri qatysty.
Otyrys barysynda agroónerkásiptik keshendi sýbsıdıalaý salasyndaǵy jáne «Almaty "Áleýmettik-kásipkerlik korporasıasy» AQ sybaılas jemqorlyq táýekelderin syrtqy taldaýdyń qorytyndylary, sondaı-aq usynymdardyń oryndalý barysy aıtyldy.
Otyrysty ashqan Álisher Ábdiqadyrov memlekettik qyzmetkerlerdi sybaılas jemqorlyqqa qarsy is-qımyl salasyndaǵy jumysty kúsheıtýge shaqyrdy.
«Árbir memlekettik qyzmetshi sybaılas jemqorlyqtyń aldyn alýǵa baǵyttalǵan naqty sharalardy qabyldaýy kerek. Sybaılas jemqorlyqqa tek úılestirilgen árekettermen ǵana tıimdi qarsy turýǵa bolady», - dep habarlady ákimniń orynbasary.
Qalalyq sybaılas jemqorlyqqa qarsy kúres vedomstvosynyń basshysy Asqat Orazhannyń aıtýynsha, atalǵan is-sharanyń maqsaty basqarmanyń aldaǵy qyzmetinde sybaılas jemqorlyq táýekelderin boldyrmaý boıynsha aldyn alý sharalaryn qabyldaý bolyp tabylady.
Sondaı-aq, otyrysta Almaty qalasy Qoǵamdyq keńesiniń tóraǵasy Altynaı Kóbeeva kórsetiletin memlekettik qyzmetterdiń sapasyna baǵalaý júrgizý úshin qoǵamdyq keńestiń áleýetin paıdalanýdy usyndy.
Otyrys qorytyndysy boıynsha sybaılas jemqorlyq quqyq buzýshylyqtardyń aldyn alý jáne jolyn kesý boıynsha tıisti usynymdar ázirlendi.