Byltyr turǵyn úı jaǵdaıy men densaýlyǵyn jaqsartý úshin zeınetaqy jınaǵyn paıdalanǵandardyń úlesi eki ese artqan.
Arnaıy shotqa 565 mlrd teńge aýdaryldy. Zeınetaqy jınaqtarynyń bir bóligin qoldanýǵa nıet bildirgender ásirese jyldyń ekinshi jartysynda belsendi bola túsken. Ótken jyldyń sońynda zeınetaqy jınaǵynyń kómegimen turǵyn úı jaǵdaıyn jaqsartqandar kóbeıdi, dep habarlaıdy aqshamnews.kz 24.kz-ke silteme jasap.
Arnaıy shotqa 69,5 mlrd teńge túsken. Bul qarashadaǵy kórsetkishten 50%-ǵa artyq. Ótinimderdi maquldaý 58%-ǵa artyp, 90 myńǵa jýyqtaǵan. Bólingen soma negizinen turǵyn úı jınaǵyn tolyqtyrýǵa jumsaldy. Tek 7 paıyzy baspana satyp alý kezinde esep aıyrysýǵa qoldanylǵan. Densaýlyǵyn túzeýge nıet bildirgenderdiń de qarasy qalyń. Bas-aıaǵy 36 myń ótinim ıeleriniń arnaıy shotyna 33 mlrd teńge tústi. Onyń basym bóligi stomatologıalyq qyzmet aqysyn óteýge jumsalǵan. Eske salaıyq, bıyl zeınetaqy jınaǵynyń bir bóligin sheship alý shegi ózgergen joq.
Taza ınvestısıalyq kiris ₸2,78 trln jetti
Sondaı-aq elde jumys berýshiniń mindetti zeınetaqy jarnalary boıynsha taza ınvestısıalyq kiris 14 mlrd teńgeden asty. Sóıtip jınaq kólemi 204 mlrd teńge bolǵan. Jarnanyń bul túri byltyr ǵana engizilgen edi. Jalpy ótken jyldyń 11 aıynda qazaqstandyqtardyń taza ınvestısıalyq kirisi 2 trln 78 mlrd teńgege jetti. Bul aldyńǵy sáıkes kezeńnen 123 paıyzǵa artyq.
Jalaqysyn konvertpen alatyndar kóp
Ókinishke qaraı, áleýmettik kepilderdi, eńbek quqyǵynyń qorǵalýyn, tipti keleshekte zeınetaqymen qamsyzdanýdy qunttamaıtyn azamattar bar. Elimizdegi árbir úshinshi jumysshy resmı tirkeýsiz eńbek etip júr. Basym bóligi – er azamattar.
Adam Research sarapshylary jaldamaly jumysshylardyń kelisimshart jasaýǵa asyqpaıtynyn aıtty. Olardyń úlesi – 6 paıyz. Sondaı-aq memleketten Kirisin jasyryp otyrǵan kásip ıeleri de bar. Al saýalnamaǵa qatysqandardyń 16 paıyzy jalaqysyn konvertpen alatynyn moıyndady. Resmı tirkeýsiz jumys istep jatqandardyń kóbi – jastar nemese zeınetkerler. Deni Túrkistan, Almaty oblystarynda jáne Shymkent qalasynda turady. Zertteýshilerdiń baıqaýynsha, kóleńkeli kásipti dóńgeletip otyrǵandar batys aımaqtarda shoǵyrlanǵan. Al resmı derekke súıensek, elde 9 mln adam ekonomıkanyń ár salasynda eńbek etedi.
Spabek Sadyqov, QR EHÁQM halyqty jumyspen qamtý departamentiniń bas sarapshysy:
-Onyń ishindegi 7 mln astamy jaldamaly jumyskerler de, 2,2 mln ózin-ózi jumyspen qamtyǵandar bolyp tabylady. Úshinshi toqsany boıynsha osy jyldyń jumyssyzdyq deńgeıi 4,6% quraıdy nemese 450 myńǵa jýyq adam.
2030 jylǵa qaraı 2 mln mamanǵa suranys týyndaıdy Osy rette aıta keteıin, aldaǵy 5 jylda 2 mln mamanǵa tapshylyq týyndaıdy. Bul týraly eńbek resýrstaryn damytý ortalyǵy habarlady.
Arnaıy zertteý nátıjesi jumys istep júrgen jastardyń 20%-y basqa salalarda qyzmet etetinin kórsetti. Qazir aýyl sharýashylyǵy, bilim berý, qurylys, densaýlyq saqtaý, t.b. salalardy qosa alǵanda úsh júz myń adam jetispeıdi. Bıyl Memleket basshysynyń Jarlyǵymen jumysshy mamandyqtar jyly jarıalandy. Qasym-Jomart Toqaev óz sózinde básekege qabiletti ekonomıka túzý úshin de jumysshy jáne basqa da túrli saladaǵy mamandardyń áleýetin arttyrýdy tapsyrdy.
Dmıtrıı Shýmekov, eńbek resýrstaryn damytý ortalyǵynyń departament dırektory:
-Ásirese joǵary bilimdi qajet etpeıtin salalarda maman tapshylyǵy qatty baıqalady. Tájirıbeli satýshy, kúzetshiler az. Qazirgi tańda tárbıeshilerdi, sondaı-aq bilim berý salalarynda bólimderdi basqaratyn adamdardy izdeımiz. Elektr montórlary, dánekerleýshiler jetispeıdi. Sonymen qatar muǵalimder, zańgerler, jattyqtyrýshylar, esepshiler men tiginshilerge suranys túsip jatyr.
Maman tapshylyǵy bar, degenmen jumys izdep sabylyp júrgenderdiń de qarasy qalyń. Qazir Eńbek kz portalynda 235 myń azamattyń túıindemesi tur. Eldegi NIT sanatyndaǵy jastardyń úlesi 6 paıyzdan asady.