Almatyda 8 qańtar túngi 12-den bastap jaýǵan qar saǵat 11:00-ge deıin jalǵasady.
Tańǵy 9-daǵy málimet boıynsha qalada 14 sm, Kamensk ústirtinde – 22 sm, Shymbulaqta – 20 sm qar jaýdy. Jaýyn-shashyn mólsheri 9 mm bolyp, aılyq normanyń (35 mm) 26%-yn qamtydy, dep habarlaıdy aqshamnews.kz Komýnaldyq ınfraqurylymdy damytý basqarmasyna silteme jasap.
Kúndizgi ýaqytta 475 arnaıy tehnıka men 1 115 jumysshy jumyldyryldy.
Qar jaýa bastaǵan sátten bastap 194 qumsepkish tehnıkanyń kúshimen kóktaıǵaqqa qarsy materıal sebilip jatyr.
Tańǵy saǵat 9-daǵy jaǵdaı boıynsha 3 600 tonna materıal paıdalanyldy. Saǵat 4:30-dan bastap jol patrúldik polısıa kólikteriniń bastap júrýimen qar kúreıtin 25 tehnıka kolonnasy uıymdastyryldy.
Janarmaı men kóktaıǵaqqa qarsy materıaldarmen qamtamasyz etýge baılanysty qar jaýýy toqtaǵannan keıin saǵat 12:00-de qaıtadan tazalaý jumystary josparlanǵan.
Jol jıekterindegi qar úıindilerin shyǵarý jumystary bastaldy.
Kólikterdiń turaqta turyp qalmas úshin ýaqytsha turaq «qaltalaryn» jartylaı jabý tájirıbesi engizildi, bul qardy tez ári sapaly shyǵarýǵa múmkindik beredi.
75 shaǵyn tehnıkanyń kómegimen trotýarlar, qoǵamdyq oryndar, áleýmettik mańyzdy nysandar, turaq «qaltalary» tazalanýda. Qoǵamdyq kólik aıaldamalary men jaıaý júrginshiler ótkelderin qolmen tazalaý jumystary da qolǵa alynǵan.
«Qazgıdromet» RMK boljaýynsha, kúndiz aýa temperatýrasy 0…-2 °S, al 12:00-den keıin -5…-7 °S-qa deıin tómendeıdi. Túnde -11…-13 °S bolady. 13 qańtarǵa deıin jaýyn-shashyn bolmaıdy.
Muz qatý qaýpine baılanysty júrgizýshilerge jyldamdyqty asyrmaýǵa, kólikter arasyndaǵy qashyqtyqty saqtaýǵa jáne qar tazalaý jumystary júrip jatqan aýmaqtarǵa kólik qoımaýǵa keńes beriledi.
Jaıaý júrginshilerge, ásirese kórý múmkindigi shekteýli jáne taıǵaq joldarda, joldan ótkende saq bolý qajet.