Eraly Toǵjanov zeınetaqy jınaǵyn paıdalaný boıynsha halyqqa úndeý jasady
QR Premer-Mınıstriniń orynbasary Eraly Toǵjanov Memleket basshysy zeınetaqy jınaqtarynyń shekti mejesin kóterý merzimin uzartý sheshimi boıynsha halyqqa úndeý jasady, dep habarlaıdy Almaty-akshamy.kz QazAqparatqa silteme jasap.
Onyń aıtýynsha, 2022 jylǵy 1 sáýirge deıin shamamen 500 myń azamatqa ózderiniń zeınetaqy jınaqtarynyń bir bóligin: turǵyn úı jaǵdaılaryn jaqsartýǵa, quny joǵary emdelý aqysyn tóleýge nemese jeke basqarýshy kompanıalarǵa berý maqsatynda paıdalanýǵa múmkindik beredi. Sondaı-aq, jyl sońyna deıin zeınetaqy jınaqtary esebinen «Otbasy banktegi» depozıtti tolyqtyrý fýnksıasy iske qosylady.
«Búgin Prezıdenttiń tapsyrmasyn jedel oryndaý maqsatynda jınaqtardyń shekti mejesin kóterý merzimin uzartý týraly Úkimet sheshiminiń jobasy ázirlendi, ol jaqyn arada qabydanatyn bolady. Osy kúnge deıin zeınetaqy jınaqtarynyń bir bóligin paıdalaný quqyǵyn 606 myńnan astam adam barlyǵy 2,2 trln teńge kóleminde qoldandy», - dedi Eraly Toǵjanov.
Onyń ishinde turǵyn úı jaǵdaılaryn jaqsartýǵa – 527,2 myń adam (2 trln astam teńge), emdelý aqysyn tóleýge – 75,7 myń adam (68 mlrd teńge) berilgen. Al 3,2 myń adam 5 mlrd teńge bolatyn jınaqtaryn jeke basqarýshy kompanıalarǵa bergen.
«Bul rette zeınetaqy júıesiniń negizgi mindeti – azamattardyń zeınetkerlikke shyqqannan keıingi jetkilikti tabysyn qamtamasyz etý ekenin atap ótkim keledi. Sondyqtan, shektilik deńgeıi de kóterilgen bolatyn. Azamattarymyz jınaqtyń shekti mejesinen joǵary somalardy paıdalaný olardyń bolashaq zeınetaqysynyń mólsherin edáýir qysqartatynyn túsinýi tıis. Sondyqtan zeınetaqy jınaqtarynyń shekti mejesi bolashaq zeınetkerlerdiń múddelerin qorǵaý úshin belgilenedi. Sol sebepti bul múmkindikti aqylmen paıdalaný kerek dep oılaımyn. Asa muqtaj bolǵanda, emdelý nemese páter alý qajet bolǵanda osy múmkindikke júgingen jón», - dedi E.Toǵjanov.