Brússelde Qazaq memleketiniń sırek kezdesetin 130 kartasy engizilgen kartografıalyq kitap shyqty.
Atlasty basyp shyǵarý úshin Muhıt-Ardager Sydyqnazarov 15 jyl boıy eńbek etken. Karta avtory ǵylymı ortalyqtardyń moıyndalǵan álemdik jınaqtaryn zertteı otyryp, dúnıejúziniń túkpir-túkpirinen aqparat jınaǵan, dep habarlaıdy Almaty-akshamy.kz
Bir qyzyǵy, 1562 jyly Belgıanyń Antverpen qalasynda alǵashqy karta jasalǵan eken. Onyń avtory – ǵalym Gerard Merkator. Atlas avtory ári saıasattanýshy Muhıt-Ardager Sydyqnazarovtyń aıtýynsha, sol kezdegi eýropalyq jáne amerıkalyq ǵalymdardyń kartalary Eýrazıanyń zertteýshileri men jıhankezderine baǵdar bolǵan. Sondaı-aq olarǵa XVI-XIX ǵasyrlardaǵy Qazaq memleketimen dıplomatıalyq, saýda-ekonomıkalyq jáne mádenı baılanystar ornatýǵa kómektesken.
«Qazaq memleketiniń ataýlary latyn, aǵylshyn, fransýz, ıtalán, frız, vallon jáne nemis tilderinde uqsas keledi, ıaǵnı «Kasaki», «Khasaks», «Kaski Tartari», «Kassakia», «Cassaqy», «Kassakia Horda», «Independent Kassaks», «Independent Kasaks Turks». Qazaqstannyń bolashaq azamattary bizdiń balalarymyz bul kartalardy kórip, memlekettiligin árdaıym bıik ustanǵan halyqtyń urpaǵy ekenin bilýi shart», - dedi saıasattaný doktory, L.N. Gýmılev atyndaǵy EUÝ-dyń qazirgi zamanǵy zertteýler ınstıtýtynyń dırektory, profesor Muhıt-Ardager Sydyqnazarov