Qazaqstanda ata-analar birjolǵy zeınetaqy tólemderin balasyn emdetýge jumsaı alady
Mundaı ózgeris QR Densaýlyq saqtaý mınıstriniń «Emdelýge beriletin birjolǵy zeınetaqy tólemderin paıdalaný qaǵıdalaryn bekitý týraly» buıryǵyna engizilmek, dep habarlaıdy Almaty-akshamy.kz QazAqparatqa silteme jasap.
«Alýshylarǵa birjolǵy zeınetaqy tólemderin óz balasyn emdeýge paıdalanýǵa jol beriledi», - delingen Densaýlyq saqtaý mınıstrliginiń ashyq normatıvtik-quqyqtyq aktiler portalyna ornalastyrylǵan buıryǵynyń jańa redaksıasynda.
Qujattyń jańa redaksıasyna sáıkes:
- ótinish berýshi qorytyndyny alǵannan keıin medısınalyq uıymdy (sonyń ishinde sheteldik uıymdy qosa alǵanda) tańdaıdy;
- sharttyń skanerlengen nusqasyn nemese tólem shotyn ári qaraı bekitedi;
- ýákiletti operatordyń ınternet-resýrsyndaǵy óziniń jeke kabınetinde dárigerlik komısıanyń qorytyndysyn qosa bere otyryp, onymen medısınalyq qyzmetter kórsetý týraly shart jasasady.
Alýshy usynǵan birjolǵy zeınetaqy tólemderiniń nysanaly maqsatyna sáıkes kelgen kezde, ýákiletti operator alýshydan qujattardy alǵan kúnnen bastap 10 jumys kúni ishinde birjolǵy zeınetaqy tólemderiniń nysanaly paıdalanylýyn tekseredi. Emdelý úshin birjolǵy zeınetaqy tólemderiniń nysanaly paıdalanylýyn rastaıtyn qujattar mynalar: medısınalyq uıym men alýshy arasynda jasalǵan medısınalyq qyzmetter kórsetý týraly shart jáne (nemese) dárilik zattardy satyp alýǵa satýshy men alýshy arasyndaǵy shart.
Medısınalyq qyzmetterdi shetelde alý kezinde derektemelerdi (tólem shotyn) jáne (nemese) medısınalyq uıym men alýshy arasynda jasalǵan medısınalyq qyzmetterdi kórsetý týraly shartty (qujattar shet tilinde jasalǵan jaǵdaılarda notarıaldy kýálandyrylǵan aýdarmasyn qosa bere otyryp) kórsete otyryp, tólemdi júzege asyrý úshin qajetti qujatty usynýǵa jol beriledi.