Almatyda Ulttyq kitaphanada «Nevada Semeı» antıadrolyq qozǵalysynyń 33 jyldyǵy atalyp ótti. Sharaǵa 1989 jylǵy jappaı qyryp-joıý qarýyna qarsy shyqqan tulǵa Oljas Súleımenov, ekolog Mels Eleýsizov, osy qozǵalys múshesi Valerıı Jandáýletov, Amantaı qajy, qoǵam qaıratkerleri, belsendiler, ǵalymdar, jastar t.b. qatysty.
Jıynda adamzatqa qaýipti qarýdyń zıany men zardaby jáne beıbitshilik tóńireginde oılar qozǵaldy. Qozǵalystyń kóshbasshysy Oljas Omarulyna ıgi tilekter aıtyldy. Aqynǵa jastar syılyqtaryn berdi. Sondaı-aq, memleket jáne qoǵam qaıratkeriniń qolynan marapattar tabystaldy.
Oljas SÚLEIMENOV,« Nevada-Semeı» qoǵalysynyń jetekshisi, aqyn:
– Bıyl bizdiń qozǵalysymyzǵa 33 jyl toldy. Bul ǵalamdaǵy iri qozǵalys boldy. Tipti kúlli jahandy dúr silkindirdi. Bizdiń beıbitshilik baǵytyndaǵy isterimizge Amerıka Qurama Shtattary, Japonıa tańqaldy. Sonymen birge bul baǵyttaǵy bastamalarymyzǵa qoldaý tanytty. Nege? Óıtkeni jappaı qyryp-joıatyn qarýdyń zıany úlken. Saldary aýyr. Ony áli sezip kelemiz. Osy jyldar ishinde tar jol, taıǵaq keshýden óttik. Bul jóninde aıtylyp ta, jazylyp ta júr. Mundaı ıgi isterdiń tamyry tereńge ketedi. Oǵan tarıh óz baǵasyn berer.
Bir nárseni aıta ketken jón. Iadrolyq qarý tutas keńestik ımperıanyń múddesi bolatyn. Buǵan tek ortalyq jaýapty edi. Bylaısha aıtqanda, tikeleı KSRO-ǵa baǵynatyn. Ol ýaqytta jastaý edik. Jiger tasyp turatyn. Qaıtpadyq, aqyry qarýsyzdaný termınin engizdik. Endigi jerde buǵan deıingi isterimiz ben sharýalarymyz toqtap qalmaq emes. Bul qozǵalysty odan ári jandandyra beremiz. Barshańyzǵa amandyq, tynyshtyq tileımiz!
Mels ELEÝSİZOV, ekolog:
– 1989 jyly jas edim. Sol kezeńderde ekologıa salasynda istep júrdim. Mine, sol ýaqytta Oljas aǵamyzǵa kómekshi boldym. Janynda bolyp, antıadrolyq qozǵalystyń isterine atsalystym. Birde áskerılerden sýyq habar jetti. Ańdap zer salsaq, ıadrolyq synaqtyń kezekti jarylysy bolypty. Naqtyraq toqtalsaq, ushqyshtar jarylys gazdyń laqtyrylǵanyn aıtty. Aǵamyz menen oqıǵanyń jaı-japsaryn surady. Men naqty neden bolǵanyn túsinbeıtinimdi aıttym. Biraq antıadrolyq ınstıtýttyń mamanyna júginýge keńes berdim. Osylaısha qyraýar sharýaǵa kirisip kettik.
Sodan búginge deıin talaı is atqaryldy. Biraz jumystar jasaldy. Bul shynymen de úlken sharýa, jalpyadamzattyq turǵydan alǵanda ǵajap is boldy ǵoı dep oılaımyn. Bir qaraǵanda jeńil sıaqty. Qozǵalystyń ishinde júrip, ystyǵyna kúıip, sýyǵyna tońǵandar túsinedi. Barsha álemge beıbitshilik tileımin!
Valerıı JANDÁÝLETOV,q oǵam qaıratkeri:
– Ózderińiz bilesizder, «Nevada-Semeı» tarıhta qalǵan oqıǵa boldy. Erlikpen parapar. Ony árbirimiz sezinip, túsinemiz dep oılaımyz. Bul uıymnyń isteri aıqyn. Onyń bárin qoǵam biledi. Osy qozǵalystyń arqasynda qanshama jannyń taǵdyry durys baǵytqa buryldy dep oılaımyz. Bir nárseni aıtpasqa bolmaıdy. Ol – Oljas Omarulynyń erligi, qaısarlyǵy.