Biz mingen júrdek poıyz shaǵyn stansadan ótip bara jatty. Eldimekennen uzaı bere zırattar kórindi. Arasyndaǵy eń záýlimi, altyn tústes kúmbezi kún kózimen shaǵylysyp, jarq-jurq etip alystan-aq birden kózge urdy. Sondaǵy kishkentaı qyzymnyń qoıǵan saýaly ǵoı:
– Anashym, bul adam sonda osy qaıtys bolǵan kisilerdiń ishindegi eń myqtysy, «glavnyıy» bolǵan ba?
Men qapelimde qaıtarar jaýap tappaı qaldym.
Qazaqstan Musylmandary dinı basqarmasy budan bylaı beıit basyna záýlim saraı salyp, marqum úshin úlken jerdi alýǵa tyıym salmaq.
Basqarma janynan ashylǵan «Qamqor-shapaǵat» ortalyǵy birneshe oblystyń máslıhatyna osyndaı usynys joldapty. Eger bul usynys depýtattar tarapynan qoldaý taýyp jatsa, 20 aımaqtaǵy zırat zańdylyǵy ózgerýi múmkin.
«Qabirge jerlengen kisiniń kim ekenin aıqyndaý maqsatynda jáne júrginshiler tarapynan taptalyp, aıaqasty bolmaýy úshin oǵan shaǵyn belgi qoıýǵa ruqsat. Qulpytas bıiktigi 1 metr, eni 50 santımetrden aspaýǵa tıis. Qulpytasqa marqumnyń aty-jóni, týǵan jyly men qaıtys bolǵan ýaqyty jazylsa jetkilikti. Qulpytasqa marqumnyń sýretin qoıýǵa ruqsat etilmeıdi», – deıdi «Qamqor-shapaǵat» ortalyǵynyń dırektory Meırambek Qabybekuly
***
Al bizdiń bul turǵyda kózqarasymyz birden ózgere qoıar ma eken? Keshe bir tanysymyzdyń qaıtys bolǵan ákesine 5 mıllıon teńgeniń qulpytasyna tapsyrys bergenin estidik. Iá, beıit salý básekege aınalyp ketkeni jasyryn emes. Eger baıqap júrgen bolsańyz, tiri adamda joq záýlim úıler bar. «Aldaraspandaǵy» Nurjan Tólendıevtiń bul týraly «evro mola» dep ájýalaǵany eske túse ketýi de zańdylyq.
Din ókilderi beıitti áspettegennen marqumǵa kelip-keter paıda joǵyn aıtady. Olardyń aıtýynsha, qaıta sol qarjyǵa jetim-jesirge kómek bergen áldeqaıda abzal.
***
Osy sátte osydan birneshe jyl burynǵy, Taldyqorǵan jaqtyń azamaty, ımam Marat Qanatulynyń aıtqany esime orala ketkeni.
– Beıit – barsha adamnyń Jaratýshy aldynda teń ekendigin, baı men kedeıdiń, jas pen káriniń, kúshti men álsizdiń bir-birinen artyq emestigin, ımandylyq sekildi izgi qasıettermen ǵana bıik turatynyn kórsetetin ǵıbrat mekeni. Áke-shesheńe qurmetińdi tirisinde kórsetken abzal. Al ólgennen keıingi saraıdaı ǵyp turǵyzǵan beıitiń tek ózińniń aýqattylyǵyńdy, ózińdi kórsetip turǵan maqtanshylyǵyń!..
***
Baıyrǵy kezde eresek adam beıitine naıza (syndyrylǵany da bolýy múmkin), áıel adamnyń beıitine baqan, pispek nemese urshyq, qyz beıitine arqan, ýyq, al jas náreste beıitine besik qoıylǵan.
Beıit, mola janynan ótken atty jolaýshy toqtap, aıaldamaıtyn jaǵdaıda oń jaq aıaǵyn úzeńgiden shyǵaryp bet sıpaı nıet etken. Aıaǵyn úzeńgiden shyǵarý yrymy «attan tústim» degendi bildiredi.
Qazir de zırattardy kórsek, mindetti túrde ishteı duǵa jasap, bet sıpaımyz. Jeńil kólikpen kele jatsaq, keıde arnaıy toqtap, nıet etemiz. Tipti, jas balalardyń da avtobýsta kele jatyp bet sıpaıtynyna súısinip qalatynymyz bar. Imandylyq degen, mine, osy!
«Almaty-akshamý», №93, 5 tamyz, 2023 jyl