Qarý-jaraq zattaryn erikti túrde tapsyrǵany úshin ár birlikke 34 myń teńgeden 345 myń teńgege deıin tólem kózdelgen.
İshki ister mınıstrliginiń habarlaýynsha, byltyr qazaqstandyqtardan 1400 birlik atys qarýy, 10 myńnan astam patrondar satyp alynǵan. Ol úshin azamattarǵa 89 mln teńge tólendi, dep habarlaıdy Almaty-akshamy.kz 24.kz-ke silteme jasap.
Tártip saqshylarynyń sózinshe, bul shara eldegi krımınogendik ahýalǵa oń septigin tıgizedi. Máselen, keıingi 5 jylda qarýly qylmys sany 50%-ke deıin azaıǵan.
«Zańsyz saqtalǵan qarý-jaraq zattardy erikti túrde ótemdi tapsyrýǵa nıet bildirgen azamat, eger onyń áreketterinde ózge quqyqbuzýshylyq quramy bolmasa, qylmystyq jáne ákimshilik jaýapkershilikten bosatylatynyn aıta ketý qajet», - deıdi QR İİM Ákimshilik polısıa komıteti qarý aınalymyn baqylaý bóliminiń bastyǵy Asylbek Ydyrysov.
Tapsyrýǵa nıet bildirgen azamat kez kelgen aýmaqtyq polısıa organyna ótinish bere alady. Ótinishti tikeleı polısıa organdarynyń kezekshi bólimderine berýge bolady nemese telefon arqyly júgingen kezde atalǵan zattardyń ornalasqan jerine barlyq qajetti is-sharalardy júrgizetin polısıa qyzmetkeri joldanady.