Zańsyz qoqys polıgonyna qatysty zańnamany qatańdatý máselesi qarastyrylýda.
Belgilenbegen jerge qoqys tókken azamattar úshin aıyppul mólsherin 69 myń teńgeden 345 myń teńgege ulǵaıtý kózdelip otyr, dep habarlaıdy Almaty-akshamy.kz 24.kz-ke silteme jasap.
Bıyl el kóleminde 3 myńnan astam zańsyz qoqys alańdary anyqtaldy. Jaýapty mamandar úıindiler sany jyl sanap azaıyp kele jatqanyn aıtady. Zań qataısa, taǵy kemı túsetini anyq deıdi olar. Taqyrypty tilshi Nurqanat Qanapıa tarqatady.
Nurqanat Qanapıa, tilshi: - Biz qazir Alash trassasynyń boıyndaǵy zańsyz qoqys polıgonynda turmyz. Al onyń dál irgesinde zańdastyrylǵan, sharbaqpen qorshalǵan qoqys polıgony jatyr. Alaıda, turǵyndardyń ol jerge qoqys tastaýǵa qulqy joq. Sebebi oǵan aqsha tóleýi kerek. Ár tekshe metrine – 3800 teńge. Al munda qansha laqtyrsańyz da óz erkińiz.
Polıgon irgesindegi bul alańǵa qatty qaldyqtardy tógýge Astana ákimdiginiń ózi ruqsat bergenin ákimdik mamany rastady. Júk kólikteri polıgon qaqpasy arqyly kirip, tarazyǵa turady. Ekobelsendilerdiń aıtýynsha, qazirgi ýaqytta saıǵa 12 myń tonnadan astam qoqys jınalǵan.
Aıdyn Esenbek, Astana qalasynyń Qorshaǵan ortany qorǵaý jáne tabıǵatty paıdalaný basqarmasynyń bas mamany: - Iá, búgingi tańda ákimdik ol jerde ýaqytsha polıgon uıymdastyrdy. Quramy ártúrli qoqysty áýeli sol jerge jınap alyp, keıin suryptaımyz. Qurylys qaldyqtaryn «Severnaıa gráda» polıgonyna jóneltemiz. Turmystyq qaldyqtar qaıta óńdeýden ótedi.
«Ǵarysh sapary» zertteýlerine súıensek, bıyl Elorda aýmaǵynan 253 iri zańsyz qoqys alańy anyqtaldy. Shaǵyndaryn esepke alsa, 500-den asady. Basqarma ókili 78 úıindi joıylǵanyn aıtady. 55 tonna qoqys shyǵarylǵan. Bulardyń basym bóligi – Esildiń sol jaǵalaýynda.
Shasalım Shagalımov, ekobelsendi: - "Ǵarysh sapary" málimeti boıynsha qalada qurylys jáne basqa da qoqys úıindileri úlken problemaǵa aınalǵanyn kórip otyrmyz. Byltyr Astanada 551 qoqys úıindisi anyqtaldy.
Bıyl ákimdik 280 úıindi joıylǵanyn aıtty. Degenmen, áli de qalanyń kez kelgen tusynan qoqys úıindilerin ońaı keziktirýge bolady. Zańnamany qatańdatý máselesi qarastyrylýda. Máselen, qazir zańbuzýshy jazaǵa tartylǵanymen tókken qoqysyn jınap áketýge mindetti emes. Úıindini joıý isi – jergilikti atqarýshy bıliktiń moınyna júkteledi. Sondaı-aq, aıyppul mólsherin 69 myń teńgeden 345 myń teńgege ulǵaıtý da kózdelip otyr.
Almaz Ysqaqov, QR ETRM Ekologıalyq retteý jáne baqylaý komıtetiniń bas mamany: - Qazir ákimshilik quqyq bazasyna qatańdatý jumystary aıaqtalǵannan keıin atalǵan qoqystar taǵy azaıady. Múmkin joıylatyn shyǵar degen úmit bar. Tasymaldaýshylar ózderi tastaǵan qoqystaryn ózderi jınap, aıyppul salynyp, al eger de qaıtalanǵan jaǵdaıda mashınasyn stoıankaǵa salý qarastyrylatyn bolady.
Byltyr jeltoqsan aıynda Premer-Mınıstr Álıhan Smaıylov 1 maýsymǵa deıin barlyq ákimdikterge zańsyz qoqys polıgondaryn tolyq joıý týraly tapsyrma berdi. Búginge deıin el kóleminde 3 myńnan astam qoqys orny anyqtalyp otyr. Qazirgi tańda olardyń tek myńnan astamy ǵana joıylǵan.