Jaz - kóliktiń kez kelgen túrimen qozǵalystyń kóbeıetin shaǵy.
Eldiń ishi bolsyn, syrty bolsyn saıahat, demalys, balalardyń demalysy dep tynym tappaǵan yǵy-jyǵy halyq. Qozǵalys kóbeıgen soń jolaýshylar tasymalynda qıyndyq týyndap, jelide únemi renish pen ashýǵa toly jazbalar da kóp. Kúni buryn, kún emes, jarty jyl buryn alyp qoıǵan ushaq ýaqytymen ushpaı, poıyzdyń kesteden qalyp qoıýyna eldiń eti úırengeli qashan. Biraq onsyz da altynǵa bergisiz ýaqytyn joǵaltqanymen, keshikkeni úshin sol áýe kompanıalarynyń bılet qunynyń 10%-yn qaıtarýy tıis ekenin bireý bilse, bireý bile bermeıdi. Osy máseleni QR Parlamenti Májilisiniń depýtaty Samat Musabaev óziniń feısbýktegi paraqshasynda jaqsy kóteripti. Sol jazbany nazarlaryńyzǵa usynýdy jón kórdik.
«Meniń aıtpaǵym da osy máselege qatysty:
Jaqynda áriptes aǵam Edil Jańbyrshın ekeýmiz el jaqqa birge ushtyq. Mańǵystaýda kezdesýlerimiz josparlanǵan edi.
Astana áýejaıyna biz ýaqtyly kelgenimizben, Air Astananyń ushaǵy ýaqtyly usha qoımady. Ýaqtyly degende jarty saǵat, bir saǵat degenge etimiz ábden úırendi ǵoı. Endi bular eki saǵat, úsh saǵattap ushpaýdy shyǵarypty. Bizdiń ushaǵymyz baqandaı úsh jarym - tórt saǵatqa keshigip ushty!
Otandyq áýe kompanıalarynyń osy jaýapsyzdyǵyna zyǵyrdanym qaınap júretin. Byltyr Májiliske kelgen kóp zańnyń biri - dál osy taqyrypqa qatysty "Kólik týraly zań" boldy.
Jıi ushamyn, keshikken ushaqtyń kesirinen talaı aýzym kúıdi, kóptegen áriptester de, azamattar da jıi aıtatyn osy máseleni.
Aldymyzǵa kelgen zańǵa "tasymaldaýshy tarap ushaq, poıyz, avtobýs quraldaryn keshiktirgen ár saǵatqa bılet qunynyń 3% ótemaqy retinde qaıtarýy tıis" degen túzetýdi Edil Terekbaıuly ekeýimiz usyndyq!
Iaǵnı, ushaq, poıyz nemese avtobýs bir saǵat keshikse 3%, eki saǵatqa 6%, osylaısha qosyla beredi. Tipti, bulaı jalǵasa berse jolaýshy bılet qunyn tolyq qaıtaryp alýy da múmkin
Bul, árıne, tasymaldaýshylarǵa unaǵan joq. Alaıda, halyqqa kerek túzetý, el únemi shaǵymdanatyn nárse bolǵan soń sózimizden tanbaı, aıtqannan qaıtpaı otyryp aldyq. Aqyry, Májilis zańǵa tolyqtyrý engizdi, Senat maquldady, qańtar aıynda Prezıdent qol qoıdy. Súıtip, osy jyldyń basynan beri bul zań kúshinde!
Air Astananyń ushaǵy tórt saǵatqa jýyq keshigip ushty. Edil aǵam ekeýmiz elge aman esen jettik. Úıge keldim de, "ózimiz erekshe eńbek sińirgen zań edi, qalaı jumys istep turǵanyn kóreıinshi" degen oımen, kompanıanyń resmı saıtyna kirip, shaǵym qaldyrdym.
Qadirli aǵaıyn! Úsh-aq qadam. Qıyn eshteńesi joq eken, men keshikken úsh saǵattan astam ýaqyt úshin bılet qunynyń 10% somasyn qaıtaryp aldym.
Bul úshin ne isteý kerek? Reti bylaı:
1) Kompanıanyń resmı saıtyna kiresiz. Tikeleı silteme: help.airastana.com. Osy jerge tolyq aty-jónińizdi, bılet nómirin, reıs nómiri, ushý ýaqyty qanshaǵa keshikkeni jáne elektron poshtańyzdy jazasyz. Iaǵnı, shaǵym qaldyrasyz.
2) support@help.airastana.com - tutynýshylardyń qoldaý bóliminen jaýap keledi, "sizdiń shaǵymyńyz tirkeldi" degen jaýap bolady jáne qosymsha anketa joldanady. Osy anketadaǵy suraqtarǵa jaýap beresiz. Aty-jónińiz ben aqshany qaıtarý úshin esepshot nómirińizdi jazasyz.
3) "Ótinishińiz boıynsha talap etken ótemaqy somasy sizdiń shotyńyzǵa jiberildi" degen habarlama keledi. Osylaısha, Siz Májilis qabyldaǵan zańnyń ıgiligin kóresiz!
Óz basymnan keshken oqıǵa. Ózimiz engizgen usynystyń, qabyldaǵan zańnyń jumys istep turǵanyn kórip, qýandym. Biraq...
Biraq, sol Edaqań ekeýimiz ushqan reıspen Aqtaýǵa 180 jolaýshy keldi. Solardyń arasynan kompanıaǵa shaǵym túsirip, ótemaqy talap etken jalǵyz men bolarmyn.
Eger, sol 180 adamnyń árqaısysy shaǵym jasap, kem degende 8 - 9 myń teńgeden ótemaqy alatyn bolsa, sol kúni Air Astana keshikken bir reıs úshin shamamen 1 440 000 teńgedeı ótemaqy tólegen bolar edi...
Ár reıs úshin bir jarym mıllıon tólep otyrý kimge unaıdy? Keleside keshikpeýdi úırener edi!
Qurmetti aǵaıyn, bul jazbam maqtan da emes, mindetsiný de emes. Bul halqymyz zańnyń tetikterin bilip, óziniń quqyqtaryn tolyǵymen paıdalansa eken degen tilek!
Eger osyndaı kishkentaı nárselerden bastap talap ete bilsek, alyp kompanıalardy jaýapkershilikke úıretemiz, birte birte tutas qoǵamǵa ózgeris ákelemiz.
Bári óz qolymyzda»! - dep aıaqtapty óz jazbasyn Samat Musabaev.