Jyl basynan beri elimizde 29620 orynǵa arnalǵan 307 mektepke deıingi uıym ashyldy. Olardyń 3-ýi memlekettik, 304-i jeke balabaqsha. Bul týraly ortalyq komýnıkasıalar qyzmetinde ótken brıfıńte mektepke deıingi bilim berý departamentiniń dırektory Natalá Jumadildaeva baıandady, dep habarlaıdy almaty-akshamy.kz
«Sońǵy 5 jylda balabaqshaǵa joldama alý kezegi eki esege tómendedi. 2025 jylǵa deıin 2-3 jastaǵy balalar úshin taǵy da 223 oryn ashý josparlanyp otyr. Sol arqyly halyqtyń mektepke deıingi uıymdarǵa degen qajettiliginiń 70 paıyzdan astamyn qamtý josparlanýda. Qazirgi tańda mektepke deıingi bilim berý uıymdaryna qoıylatyn basty talap - sanǵa emes, sapaǵa jumys jasaý. Memleket basshysynyń tapsyrmasy aıasynda 2023 jyly 20 myńnan astam pedagog biliktiligin arttyrady, sondaı-aq, 79 mektepke deıingi uıymda «Quzyrettilik ortalyqtary» turaqty negizde jumys jasaıdy», - dep atap ótti Natalá Jumadildaeva.
Sońǵy tórt jylda tárbıeshilerdiń eńbekaqysy kezeń-kezeńimen 25%-ǵa ósti. 2023 jyldyń qyrkúıeginde jalaqy taǵy da 30%-ǵa kóteriledi. Sonymen qatar, mektepke deıingi bilim berý uıymdaryna kezekke turýdyń biryńǵaı bazasyn engizý júzege asyrylady. Bul qyzmetterdiń ashyqtyǵyn qamtamasyz etedi, derekterdiń biryńǵaı tizilimin qalyptastyrady jáne sybaılas jemqorlyq táýekelderin azaıtady.