Dúnıege kelgen sátten bastap ómirińniń sońǵy kúnine deıin kúresip ótesiń. Árbir basqan qadamyńa senimdi bolý úshin búgingi kúni bilimiń jetik bolýy tıis. Osyndaı qarbalas zamanda óz quqyǵymyzdy qorǵaı almaı jatatyndyǵymyz ótirik emes.
Búgingi kúni úlkender: «Shamań kelse, zańdy oqyp. Sonda ǵana ózgege jem bolmaısyń» - dep jatady. Óz quqyǵyn bilmegendikten joq jerde opyq jep jatqandar az emes. Bul quqyqtyq saýatsyzdyqtan dep bilemin.
Jumyssyzdyq jaıy búgingi kúngi máseleleriniń biri. Arman qala Almatyǵa oqý, jumys izdep kelip, qur alaqan qaıtyp jatqan adam sanynan góri aldanyp jatqandar kóbirek. Stýdentter arasynda tájirıbeni bir aı ótip, jumysqa alynbaı, kók tıynsyz qalyp jatatyndary da bar. Mundaı jaǵdaılarlarda árbir azamat óz quqyǵyn, eńbek zańyn bilmeı jatsa, jaǵdaı tek qıyndaı túsedi.
Gazet-jýrnal betterinen zań men qylmysqa baılanysty maqalany oqyp, baıybyna baryp jatqandar sanaýly shyǵar. Azamattyq quqyǵymyzdy qansha taptap jatsa da tabandylyq kórsetetinder az. Keı kezderi qazaqqa tán «uıat» jibermeı qalatyn kezder bolady.
Jaqynda QazUÝ-dyń zań fakúlteti azamattyq quqyq jáne azamattyq is júrgizý, eńbek kafedrasynyń aǵa oqytýshysy Karasheva Janar apaıymyzdyń «Aqyly qyzmet kórsetý shartynyń qalyptasý negizderi» atty maqalasyn oqydym. Avtor óziniń jumysynda aqyly qyzmet kórsetý shartyn anyqtaý jáne damý zańdylyqtaryn qarastyrady.
Azamattyq qoǵam ınstıtýttarynyń jan-jaqty damýy, memleket pen qoǵam qatynastarynyń úılesimdiligi baǵdarynyń nátıjesinde memlekettik jáne qoǵamdyq ınstıtýttardyń neǵurlym belsendi ózara is-qımylyna konstıtýsıalyq tyıymdar men shekteýler alyp tastalǵandyǵy jáne sonyń nátıjesinde búginde bizdiń eldiń ishki jaǵdaıy men qajettilikterine tolyqtaı saı keletin jergilikti ózin-ózi basqarý júıesi jańartylǵandyǵyn aıtyp ketken bul eńbektiń baıybyna bara bilseń, quqyq salasynan saýatyń biraz ashylady. Otbasy quqyǵy, búgingi kúni beleń alyp kele jatqan jas otbasylardyń arasyndaǵy ajyrasý máselesi, ortaq múlikti bólý máseleleri, balalardyń quqyqtary jóninde jazylǵan maqaladan ózime qajet biraz oı túıdim. Qashan da eńseńdi tik ustaý úshin jan-jaqty bolǵan durys eken. Eńbek tártibine baılanysty týyndaǵan daýlardy sheshý jolynda óz quqyǵyn qorǵaı bilýge qatysty Hýdaıberdına Gúlnur ustazymyz kóptegen máselelerdi ashyp jazǵan. Maqalany oqý barysynda óz - ózińe senimdilik paıda bolatynyna kózim jetti. Sebebi óz quqyǵyn bilgen adam jaıdan-jaı ózgeniń degenine kóne qoımaıdy.