Almatyda «Zań men tártip» aptalyǵy bastaldy. 24–28 maýsym aralyǵynda qalanyń barlyq aýdanynda quqyqtyq mádenıetti arttyrý, zań buzýshylyqtyń aldyn alý jáne azamattar men memlekettik organdar arasyndaǵy baılanysty nyǵaıtýǵa baǵyttalǵan birqatar is-shara ótýde. Bul týraly Óńirlik komýnıkasıalar qyzmetinde ótken baspasóz máslıhatynda aıtyldy, dep habarlaıdy aqshamnews.kz
Almaty qalasy prokýratýrasynyń resmı ókili Raıymbek Sháripbaevtyń aıtýynsha, aksıanyń negizgi maqsaty – zańnyń ústemdigin nyǵaıtyp, bılik ınstıtýttaryna degen qoǵamnyń senimin arttyrý.
«Zań – tek erejeler jınaǵy emes. Ol – tártiptiń negizi, qaýipsizdik pen ádildiktiń kepili. Eger zań buzýshylyqpen jedel kúressek, qoǵamda «zańmen sanasý kerek», «zańmen sanasqan durys» degen túsinik birtindep qalyptasa bastaıdy», – dedi Sháripbaev.
Apta boıy qala boıynsha jyljymaly quqyqtyq toptar jumys isteıdi. Olardyń quramyna prokýratýra, polısıa, sybaılas jemqorlyqqa qarsy qyzmet, ekonomıkalyq tergeý departamenti men ákimdik ókilderi kirgen. Azamattar bul toptardan tegin quqyqtyq keńes alyp, ótinish berip, óz quqyqtaryn qalaı qorǵaýǵa bolatynyn bile alady.
Jyljymaly toptyń jumys kestesi:
• 24 maýsym – Almaly jáne Bostandyq aýdandary;
• 25 maýsym – Jetisý jáne Medeý aýdandary;
• 26 maýsym – Áýezov jáne Túrksib aýdandary;
• 27 maýsym – Naýryzbaı jáne Alataý aýdandary.
Sonymen qatar, qala prokýratýrasy iske asyryp jatqan «Quqyqtyq dárihana» jobasy da jumys isteıdi. Bul joba aıasynda aptanyń sársenbi, beısenbi jáne juma kúnderi saǵat 17:00–20:00 aralyǵynda Dostyk Plaza, MEGA Alma-Ata jáne Grand Park saýda ortalyqtarynda azamattarǵa tegin keńes beriledi.
Keńes alǵysy keletin nemese zań buzýshylyq faktileri týraly habarlaǵysy keletinder úshin «Senim telefony» da iske qosylǵan.
Prokýratýra jastarmen jumysqa da erekshe mán berip otyr. Osy baǵytta «Zhastarmen» Telegram-arnasy arqyly arnaıy platforma qurylyp, jastarǵa quqyqtyq kómek kórsetiledi, esirtkige qarsy kampanıalarǵa qatysýǵa múmkindik beriledi.
«Qazirdiń ózinde bul arnada 4000-nan astam adam tirkelgen. Olar – jaýapty, belsendi jastardyń birlestigine aınalyp úlgerdi», – dedi Raıymbek Sháripbaev.
Joba aıasynda ondaǵan reıd júrgizilip, tyıym salynǵan zattardy taratqan júzdegen Telegram-arnalar jabylǵan, 6000-nan astam zańsyz graffıtı óshirilgen. Al 26 maýsym kúni Mahatma Gandı atyndaǵy saıabaqta jastar esirtkige qarsy fleshmobqa qatysa alady.
Almaty polısıa departamentiniń resmı ókili Saltanat Ázirbek jastardyń arasynda tártip saqtaýdy qamtamasyz etýdiń barysy týraly baıandady. Onyń aıtýynsha, polısıa jasóspirimderdiń arasyndaǵy zań buzýshylyqqa, esirtkimen kúres pen kıberqylmysqa kóp kóńil bólip otyr.
«Biz qylmysty der kezinde anyqtap qana qoımaı, esirtki qoldanyp, esirtki taratýmen aınalysatyn jasóspirimdermen jumys isteýge de mán berip otyrmyz. Bizdiń mindet – osylardyń ýaqytyly aldyn alyp, eskertip, olardy qorǵaý. Biz – óskeleń urpaqty tárbıeleýde úlken ról atqaratyn mektepterge, kolejderge baryp, olarmen jeke-jeke áńgimelesýge de daıarmyz», - deıdi Saltanat Ázirbek.
«Zań men tártip» aptalyǵy sheńberinde Almaty qalasynyń Ekonomıkalyq tergeý departamenti (ETD) de óz baǵdarlamasyn usyndy. ETD ókili Jaqsylyq Myrzahan alaıaqtyqtyń aldyn alyp, quqyqtyq saýattylyqty arttyrý boıynsha júrgizilip jatqan jumystar týraly baıandady.
Departamenttiń bastamalarynyń biri – «Ashyq esik kúnderin» uıymdastyryp, mektep oqýshylaryna qyzmettik ıtter men kınologtardyń jumysyn kórsetýge arnalǵan ekskýrsıalar ótkizý.
Sonymen qatar, «XXI ǵasyrdyń qarjy trıggeri» atty forým ótkizý josparlanǵan. Bul jıynǵa qarjy sektorynyń mamandary, advokattar jáne qarjylyq saýattylyq boıynsha sarapshylar qatysyp, qarjy salasyndaǵy qaýipter men olardan qorǵaný joldary jóninde keńes beredi.
«Bul is-sharalardyń negizgi maqsaty – turǵyndardyń qarjylyq saýattylyǵyn arttyryp, quqyqtyq mádenıetin kóterý. Biz ekonomıka salasyndaǵy zańsyzdyqtardyń aldyn alyp, azamattardyń quqyqtaryn qorǵaýdy jalǵastyra beremiz», – dedi Jaqsylyq Myrzahan.
Buǵan deıin de departament jastarǵa arnalǵan birqatar jobalardy júzege asyrǵan. Máselen, stýdenttermen jumys istep, qarjylyq saýattylyq jóninde respýblıkalyq olımpıada uıymdastyrǵan. Bul sharada jastar qarjysyn qorǵaýdy, alaıaqtyqtan saqtanýdy jáne zańdyq bilimin arttyrýdy úırendi.
«Zań men tártip» aptalyǵy – turaqty ári qaýipsiz qarjylyq orta qalyptastyryp, azamattardyń quqyqtyq jaýapkershiligin arttyrýǵa baǵyttalǵan keń aýqymdy baǵdarlamanyń bir bóligi ǵana. Uıymdastyrýshylar qala turǵyndaryn belsendi qatysýǵa, zań men tártipti nyǵaıtý jolynda birlese áreket etýge shaqyrady.