Qazaqstanda qoǵamdyq qaýipsizdikti qamtamasyz etý baǵytyndaǵy júıeli sharalar oń nátıjesin berýde. Memleket basshysy Qasym-Jomart Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýyn jáne basqa da tapsyrmalaryn oryndaý sheńberinde İshki ister mınıstrligi qylmysqa qarsy kúresti kúsheıtip, qaýipsiz qala jáne aýyldyq ortany qalyptastyrýǵa kúsh salyp otyr.
Qazirgi tańda kún saıyn 14 myńnan astam polısıa qyzmetkeri men Ulttyq ulannyń áskerı qyzmetshileri qoǵamdyq tártipti qadaǵalaıdy. El boıynsha 15 myńnan astam patrúldeý marshrýttary ázirlenip, barlyq problemalyq aımaqtar qamtyldy. Bul qylmystardyń aldyn alýǵa jáne quqyq buzýshylyqtardyń qaıtalanýyn azaıtýǵa múmkindik berdi.
-
Bıyl qoǵamdyq oryndar men kóshelerde quqyq buzýshylyqtar sany azaıdy.
-
Buryn sottalǵandar tarapynan jasalatyn qylmystar tómendedi.
-
Polısıa qyzmetkerleri 10 myńnan astam qylmysty ashty,
-
Sondaı-aq 10 mıllıonǵa jýyq ákimshilik quqyq buzýshylyqtyń joly kesildi.
İshki ister mınıstri Erjan Sádenovtyń aıtýynsha, qabyldanǵan sharalar arqasynda eldegi qylmystar sany 13%-ǵa qysqarǵan, bul ótken jylmen salystyrǵanda 9 myń qylmysqa az degen sóz.
— «Bizdiń jumystyń negizi – "Zań jáne tártip" qaǵıdaty. Aldyn alý sharalarynyń nátıjesinde kisi óltirý, qaraqshylyq, tonaý, buzaqylyq, urlyq jáne mal urlyǵy sıaqty aýyr qylmystar azaıdy. Buryn sottalǵandar jasaıtyn qylmystardyń, sondaı-aq qarýmen jasalatyn quqyq buzýshylyqtardyń sany tómendedi. Sonymen qatar qylmystardyń ashylý kórsetkishi jaqsardy», — dedi mınıstr.
Jalpy, qylmys deńgeıiniń tómendeýi quqyq qorǵaý organdarynyń úılesimdi jumysynyń nátıjesi bolyp otyr. Bul azamattardyń qaýipsizdigin qamtamasyz etýge, qoǵamda zańǵa degen senimdi arttyrýǵa jáne «Ádiletti Qazaqstan» qurýǵa baǵyttalǵan naqty qadamdardyń biri sanalady.