Almaty ákimi Erbolat Dosaevtyń tapsyrmasy boıynsha stıhıalyq saýdaǵa qarsy kúres jáne memlekettik qordyń jerinde zańsyz ornatylǵan stasıonarlyq emes saýda nysandaryn (budan ári – SSN) joıý maqsatynda qalanyń kásipkerlik jáne ınvestısıalar basqarmasy stasıonarlyq emes saýda nysandaryn jappaı bólshekteý jumystaryn bastady, dep habarlaıdy aqshamnews.kz
Qalanyń barlyq aýdandarynda arnaıy jumys komısıalary quryldy, olardyń quramyna memlekettik organdardyń, Almaty qalasy Polısıa departamentiniń ókilderi, máslıhat depýtattary, Qoǵamdyq keńestiń jáne QR «Atameken» UKP músheleri kirdi.
Eki kún ishinde 21 zańsyz nysan bólshektelgen. Máselen, Áýezov aýdanynda Abaı dańǵylynyń boıyndaǵy 4-shaǵynaýdanda 2 saýda núktesi bólshekteldi, olar kondıterlik ónimder men kóshe taǵamdaryn satýmen aınalysqan. Bul rette obektiler sýmen jabdyqtaýǵa jáne sý burýǵa qoljetkize almaǵan ári elektr jelilerine ruqsat qujattarynsyz ózderi qosylǵan.
Kókjıek shaǵynaýdanynda kókónister men nan ónimderin satýmen aınalysqan zańsyz ornatylǵan stasıonarlyq emes saýda núkteleri de bólshekteldi. Onyń aınalasy abattandyrylmaǵan, bul jergilikti turǵyndarǵa qolaısyzdyq týdyrdy.
Kóptegen kásipkerler men turǵyndar mundaı sharalardy qoldap, barlyq sanıtarlyq normalar men qaýipsizdik erejelerin saqtaý qajettigin atap ótti. Áýezov aýdanynyń turǵyny Larısa Merǵalıeva zańsyz saýda nysandaryn buzýdy qoldaıtynyn atap ótti.
«Zańsyz saýda núkteleriniń ınjenerlik jelilerge qosylýǵa zańdy negizi joq, keıbireýlerinde tipti sý joq. Bul satýdyń sanıtarlyq jaǵdaıyna da áser etedi. Olar zańsyz jumys isteıtindikten, sanıtarlyq-epıdemıologıalyq qadaǵalaýdan da tys qalǵan ári bul da qaýipti. Sondyqtan mundaı nysandardy buzý kerek», - dedi ol.
Kásipkerler sondaı-aq qyzmetti zańdy negizde júzege asyrý qajet dep sanaıdy.
«Qalada órkenıetti, zańdy saýdany uıymdastyrý máselesi baıaǵyda baıaǵydan beri aıtylyp keledi. Sondyqtan qazir osy baǵytta qajetti sharalardy qabyldaı bastaǵanymyz jaqsy. Almaty-elimizdegi eń iri saýda ortalyqtarynyń biri. Osy turǵydan alǵanda, megapolıstegi barlyq saýda núkteleriniń zań boıynsha barlyq talaptardy oryndaı otyryp, tek zańdy negizde jumys isteýi mańyzdy», - dep atap ótti kásipker Móldir Jumasheva.
Bólshekteý prosesinde ınjenerlik komýnıkasıalyq jelilerden, elektr jáne sýmen jabdyqtaýdan ajyratý kózdelgen. Qalalyq Polısıa departamenti aýdan ákimdikterimen birlesip, bólshekteý ornynda qoǵamdyq tártip pen qaýipsizdikti qamtamasyz etýde.
Eske salsaq, Almaty qalasy ákimdiginiń 2024 jylǵy 27 tamyzdaǵy №3/469 «Almaty qalasynyń aýmaǵynda stasıonarlyq emes saýda nysandaryn ornalastyrý oryndaryn belgileý jáne bekitý týraly» Qaýlysyna sáıkes qalada 157 stasıonarlyq emes saýdan nysandaryn ornalastyrý úshin 142 oryn bekitilgen. Stasıonarlyq emes saýda nysandarynda zańdy negizde qyzmetin jalǵastyrýǵa nıet bildirgen kásipkerler Almaty qalasy Kásipkerlik jáne ınvestısıalar basqarmasynyń saýda bólimine 390 21 30 telefony boıynsha júgine alady.