Prezıdent tapsyrmasy
Onyń negizgi prınsıpteri – zańdylyq, habardarlyq jáne jedeldik
Ortalyq komýnıkasıalar qyzmetinde ótken brıfıńte İshki ister mınıstriniń birinshi orynbasary Marat Qojaev ishki ister salasyn sıfrlandyrý týraly baıandady.
Spıkerdiń aıtýynsha, salany sıfrlandyrý arqyly búrokratıadan aryltý jáne ońtaılandyrý prosesi bastalǵan. Nátıjesinde polısıa qyzmetkerleriniń nazary quqyqbuzýshylyq profılaktıkasyna, ıaǵnı basty mindetterin oryndaýǵa baǵyttalýda.
- «Barlyq polısıa bólimsheleri beınebaqylaý kameralarymen jabdyqtalǵan. 18 myńnan astam beınekamera ornatylǵan. Bul jumys qylmystyq atqarý júıesindegi mekemelerde de iske asyrylýda. Beınebaqylaýdyń arqasynda 14 myń oqıǵa men zań buzýshylyq anyqtaldy, 79 sýısıd pen 11 túrmeden qashý áreketiniń joly kesildi».
Azamattardyń qaýipsizdigi úshin mektepter men qoǵamdyq oryndarda da beınebaqylaý kameralary ornatylyp jatyr. Sonymen qatar, jol qozǵalysyn qadaǵalaý prosesi de sıfrlandyrylýda. Atap aıtqanda, jol qozǵalysy erejelerin buzý faktilerin anyqtaıtyn avtomatty júıeler sany artqan, búginde olardyń sany 18 myńnan asady. Ótken jyldyń ózinde osy júıeler arqyly 4 mln astam zań buzýshylyq anyqtalǵan. «Mundaı kameralar júrgizýshilerdi tártipke keltirip jatyr. Bul rette quqyq buzýshy men polısıa arasynda tikeleı baılanys joq, ıaǵnı zańsyz sheshim qabyldaýǵa múmkindik te joq», – dedi mınıstrdiń orynbasary.
Onyń aıtýynsha, patrúldik kólikterde ornatylǵan mobıldi avtomatty radarlar da osyndaı prınsıp boıynsha jumys isteıdi. Qazir elimizde mundaı 84 qural bar, olar óz tıimdiligin jaqsy kórsetip jatyr. «Osyndaı bir ǵana zamanaýı radar orta eseppen 20–25 avtopatrýlge teń keletin buzýshylyqtar sanyn anyqtaıdy. Qandaı da bir túzetýler engizý nemese fotosýretter men beınederekterdi joıý múmkindigi joq. Buzýshylyqtar týraly aqparat dereý, avtomatty túrde Bas prokýratýranyń arnaıy esepter komıtetine jiberiledi», – dedi M.Qojaev.
Sonymen qatar, elimizdiń 16 qalasynda «Qorǵaý – qaýipti júrgizýshi» baǵdarlamasy engizilgen. «Mysaly, qaýipti júrgizýshi jol erejesin birneshe ret buzyp kele jatsa, qorǵaý júıesi ol týraly ınspektordyń planshetine dereý habarlama jiberedi. Polısıa qyzmetkeri dereý áreket etip, qaıǵyly jaǵdaıdyń jolyn kesedi. Osyndaı sharalardyń arqasynda jol-kólik oqıǵalarynyń sany 11%-ǵa, qaza tapqandar sany 7%-ǵa, jaraqat alatyndar 16%-ǵa azaıdy, jaıaý júrginshiler arasynda qaza bolǵandar 24%-ǵa tómendedi», – dedi ishki ister salasynyń ókili.
Budan basqa, polıseıler arnaıy mobıldik qosymshasy bar zamanaýı beınetirkegishtermen jabdyqtalǵan. Sonyń arqasynda olar jedel basqarý ortalyǵyna oqıǵa ornynan onlaın translásıa jibere alady. Olardyń bul beınelerdi joıýǵa jáne óńdeýge múmkindigi joq.
- «Azamattarǵa yńǵaıly bolý úshin 102 mobıldi qosymshasy ázirlenip, iske asyryldy. Bul mobıldi qosymshada SOS túımesi kózdelgen. Eger bir oqıǵa bolyp, sol túımege basyp, qońyraý shalynsa, operator ótinish berýshiniń ornalasqan jerin derbes anyqtap, oqıǵa ornyna jaqyn jerdegi polısıa jasaǵyn jiberýge múmkindigi bar. Búgingi kúni osy qosymsha arqyly 206 myń habarlama kelip tústi, onyń ishinde 55 myńnan astam habarlama túrli messendjerler arqyly túsken».
- Qylmystyq is júrgizý kodeksine engizilgen ózgerister qylmystyq isterdi tergeýdiń tolyq beıneformatyna kóshýge negiz bolady.
- İİM halyqty qoǵamdyq qaýipsizdikti qamtamasyz etý tujyrymdamasyn birge talqylaýǵa shaqyrady.
Brıfıńte Marat Qojaev elimizde tirkeletin barlyq qylmystyq isterdiń 96%-yn, al ákimshilik óndiristerdiń 97%-yn ishki ister organdary júrgizetinin aıtty. Oǵan qosa, memlekettik kórsetiletin qyzmetterdiń 39 túri boıynsha jyl saıyn 10 mln astam qyzmet kórsetiledi. Iaǵnı halyqpen eń jıi jáne tyǵyz jumys isteıtin organ – ol polısıa.
«Bizdiń qyzmetkerlerdiń is-áreketine qarap bılik týraly jalpy kózqaras qalyptasady. Sony eskerip, qazir Qazaqstannyń polısıasy zamanaýı servıstik modelderge kóship jatyr. Onyń negizgi prınsıpteri – zańdylyq, jan-jaqtylyq, ádeptilik, habardarlyq jáne jedeldik. Bul qoǵammen birge qaýipsizdikti qamtamasyz etý tujyrymdamasynda kózdelip otyr», – dedi M.Qojaev.
Tujyrymdamanyń basty ereksheligi – qoǵamdyq qaýipsizdikti qamtamasyz etý salasynda jınalǵan júıelik problemalardyń sebebin joıýǵa baǵyttalýy. Strategıalyq qujattyń negizgi baǵyttary – quqyqtyq buzýshylyqtyń túpki sebepteri men jaǵdaılaryn joıý arqyly azamattardyń ómirin, densaýlyǵyn jáne múlkin qorǵaý deńgeıin arttyrý, azamattardyń úmitine saı keletin jańa formattaǵy polısıa qurý bolyp otyr. «Qujat jobasy İİM saıtynda jarıalanǵan, qujatty talqylaýǵa barlyq belsendi azamattardy shaqyramyz», – dedi İshki ister mınıstriniń birinshi orynbasary.
Brıfıńte halyqtyń qaýipsizdigin qamtamasyz etý boıynsha jumystardyń tıimdiligin arttyrý úshin ishki ister organdarynda ishki júıelikti qaıta qurý týraly aıtyldy. Búginde Memleket basshysynyń tapsyrmasy aıasynda halyqtyń qaýipsizdigin qamtamasyz etý tujyrymdamasy ázirlenýde. Onyń negizgi baǵyttarynyń biri qylmystyq prosesti ońtaılandyrý bolyp tabylady. Qazirdiń ózinde qylmystyq isterdiń 90%-y elektrondyq formatta tergelýde, bıyl 19 mamyrdan bastap tergeýdiń beıneformatyn engizý josparlanýda. Bul týraly jýrnalısiń suraǵyna bergen jaýabynda İİM Tergeý departamentiniń basshysy, polısıa general-maıory Sanjar Ádilov aıtyp berdi. Prezıdenttiń tapsyrmalaryn oryndaý boıynsha birinshi kezektegi is-sharalar josparynyń novelalarynyń biri tergeýshiniń qysqasha hattama jasaý quqyǵyn engizý bolyp tabylady.
İİM Tergeý departamentiniń basshysy atap ótkendeı, buryn oqıǵa bolǵan jerdi tekserýden bastap, jaýap alý, betpe-bet júzdestirý jáne t.b. sıaqty negizgi tergeý áreketterine deıingi tergeý áreketterin júrgizýge kóp ýaqyt jumsalǵan. Tergeý áreketterine qatysýshylar hattamanyń daıyn bolýyn birneshe saǵat kútýge májbúr boldy. Endi barlyq tergeý áreketteri basynan aıaǵyna deıin vıdeoǵa jazylady. QPK-niń 199-babyna engizilgen túzetýge sáıkes, tergeýshi tergeý áreketteriniń qysqasha mazmunymen tergeý áreketteri vıdeosynyń qysqasha hattamasyn jasaıdy. Bul az ýaqyt alady. «Eń mańyzdysyn aıtar bolsam, biz qarapaıym polısıa tergeýine kóshýge daıyndalyp jatyrmyz. Qylmystyq is júrgizý kodeksine engizilgen ózgerister tergeý organdarynyń qylmystyq isterdi tergeýdiń tolyq beıneformatyna kóshýine negiz bolady», – dep túıindedi İİM Tergeý departamentiniń bastyǵy.
«AQSHAM-AQPARAT».
(Derekkóz: ortcom.kz).