Ulttyq ónerimiz Túrkıada ulyqtaldy
«Almaty aqshamy» gazeti qalamyzdyń mádenı ómirinen qalys emes. Teatr bolsyn, kórmeler deısin be, barlyǵy qamtylyp, jańalyqtar jazylyp jatady. Osyǵan deıinde 8 shildege qarasty nómirimizde «Alataý» dásúrli óner teatrynda buryn sondy bolmaǵan tusaýkeser – jańa baǵyttaǵy «Altybaqan» án-keshi jaıly aıtqan bolatynbyz. Endi, mine, teatr ujymy osy qoıylymmen Túrkıada ulttyq ónerimizdi pash etti.
Jalpy, Qazaqstan men Túrkıa memleketteri arasyndaǵy mádenı baılanystardyń bir tarmaǵy – teatr men mýzyka óneri salasyndaǵy qarym-qatynastar. Baýyrlas eki eldiń mádenı seriktestiginde dástúrli mádenıet úlgilerin jańǵyrtýdyń da mańyzy erekshe. Bul - eki eldiń tól mádenıetinde qandaı erekshelikteri men uqsastyqtarynyń bar ekenin tanytatyn tusy.
Almaty qalasynyń ákimdigi, Almaty qalasynyń ákimdigine qarasty Almaty qalasy mádenıet basqarmasy, Qazaqstan Respýblıkasynyń Túrkıa Respýblıkasyndaǵy elshiligi, Ystambul qalasy ákimdigi jáne Almaty qalasy mádenıet basqarmasyna qarasty «Alataý» dástúrli óner teatrynyń uıymdastyrýymen Qazaqstannyń Táýelsizdiginiń 30 jyldyǵyna oraı ulttyq ónerimizdi tanytý, ulttyq biregeılikti dáripteý maqsatynda 2021 jyldyń 25 qarasha kúni Túrkıanyń Ystambul qalasynda Djemal Reshıt Reı Konser Salonýnda «Altybaqan» oıyn-saýyq án keshi ótti.
Ultymyzdyń maqtanysh eter asyl murasy, rýhanı jádigerleri ishinde umyt bolyp bara jatqan qazaqtyń turmys-saltynan syr shertetin «Altybaqan» ulttyq oıyny – qazaq jastarynyń erteden kele jatqan keshkilik bas qosyp, án aıtyp, dombyra tartyp, aıtys jasap, bı bılep, túrli oıyndar oınap, kóńil kóterip, oıyn-saýyq quratyn keshi. Osy ulttyq oıynnyń tóńireginde áýeletken dástúrli án men kúmbirlgen kúı, aqyndyq pen bılerimiz bir birimen astasqannan keıin «Altybaqan» jaı oıyn ǵana emes, sol kezdegi qazaqy ónerdiń uıytqysyna aınalǵan, mańyzdy mádenı sharamen teńbe-ten bolǵan. Kóshpeli qazaq óner bólek bir sala emes, ómirdiń ózindeı bolatyn. Sondyqtan osy qoıylymmen baýyrlas elde óner kórsetý, eki el arasyndaǵy sabaqtastyqqa ózindik úlesin qosqanyna, ózindik dástúrimzdi nasıhattaýǵa úles qosqany sózsiz.
Án keshine Qazaqstan Respýblıkasynyń Túrkıadaǵy Tótenshe jáne Ókiletti Elshisi Abzal Saparbekuly arnaıy kelip, quttyqtaý sózin aıtty. Sondaı-aq baýyrlas túrik elinde bilim alyp júrgen otandastarymyz, túrkıalyqtar jáne t.b. boı kórsetti. Abzal Saparbekuly túrik jáne ázerbaıjandyq óner sańlaqtary men kórermender qatarynda ónerpazdarymyzdyń talanttaryna tánti bolyp, ulttyq ónerimizdiń órkendeı berýine demeý kórsetken Almaty qalasynyń ákimi Baqytjan Ábdiruly Saǵyntaevqa, teatr dırektory Rınat Zaıtov pen qoıylymnyń kórkemdik jetekshisi Juldyzbek Jumanbaıǵa, ónerpazadarymyzǵa alǵystaryn aıtyp, jyly lebizderin bildirdi.
«Men barlyq teatr ujymyna, rejıser myrzaǵa sheksiz alǵys bildiremin. Ózimiz ázirbaıjandyqpyz, qazaq tilin bilmesek te, ánshilerdiń ásem daýysy arqasynda qoıylym túrki mádenıetiniń úlgisin júrekke jyly jetkize aldy. Ásirese, ázirbaıjan halyq áni oryndaǵanda, qyzym eriksiz jylap jiberdi. Óz atymyzdan Qazaqstanǵa úlken alǵys bildiremiz, mundaı keshter jalǵasa berse eken», - dedi kórermen.
Qazaqstannyń Tuńǵysh Prezıdenti – Elbasy N. Á. Nazarbaev óziniń «Uly dalanyń jeti qyry» atty maqalasynda: «Aýyzsha jáne mýzykalyq dástúrdi jańǵyrtý qazirgi zamanǵy aýdıtorıaǵa jaqyn ári túsinikti formatta bolýy kerek», – dep atap kórsetken bolatyn. Rýhanı qundylyqtardyń túpki máni ulttyq óner ekeni belgili. Bul adamdardyń rýhanı qajettilikterin qanaǵattandyrady. Qazaq halqynyń ulttyq dástúrli óneri – máńgilik óshpeıtin ómirsheń qazyna. Kúlli álemge maqtanyshpen kórsete alatyn sımvolymyz. Tól ónerimizdi órge súırep, barynsha nasıhattaý – barshamyzdyń paryzymyz. Padısha dástúrli án ónerimiz qanatyn keńge jaıyp, uly dala rýhy asqaqtaı bergeı!