Qazaqstan Respýblıkasynyń Premer-Mınıstri Asqar Mamın beınekonferensıa baılanysy rejıminde Ózbekstan Respýblıkasynyń Premer-Mınıstri Abdýlla Arıpovpen kelissóz júrgizdi, dep habarlaıdy almaty-akshamy.kz
Taraptar Ózbekstan Respýblıkasynyń Prezıdenti Shavkat Mırzıeevtiń Qazaqstanǵa jasaǵan memlekettik saparynyń jáne Qazaqstan Respýblıkasynyń Prezıdenti Qasym-Jomart Toqaevpen (bıylǵy 6 jeltoqsan) ótken kelissózderiniń, sondaı-aq Yntymaqtastyq jónindegi birlesken úkimetaralyq komısıanyń 19-otyrysynyń (bıylǵy 26 qarasha) qorytyndysy boıynsha qol jetkizilgen ýaǵdalastyqtardyń iske asyrylý barysyn qarady.
Saýda-ekonomıkalyq, ınvestısıalyq, tranzıttik-kólik, aýyl sharýashylyǵy, sý-energetıka, ónerkásiptik kooperasıa, sıfrlandyrý, densaýlyq saqtaý, bilim berý, týrızm jáne basqa da salalardaǵy ekijaqty ózara is-qımyldy damytýdyń ózekti máseleleri talqylandy.
Yntymaqtastyqtyń árbir baǵyty boıynsha eki eldiń salalyq mınıstrlikteri men vedomstvolarynyń basshylary baıandama jasady. Qazaqstan men Ózbekstanǵa Ortalyq Azıadaǵy barlyq óńirlik saýdanyń 70%-ǵa jýyǵy tıesili.
2021 jyldyń 10 aıynda ekijaqty saýda kólemi $3,26 mlrd qurady, bul 2020 jyldyń sáıkes kezeńindegi kórsetkishten 29,8%-ǵa joǵary. Sondaı-aq bul kórsetkish 2019 jyldyń 10 aıymen salystyrǵanda 10,6%-ǵa joǵary. QR-dan ÓR-ǵa eksport kólemi, 2020 jyldyń 10 aıymen salystyrǵanda, 31,6%-ǵa ulǵaıyp, $2,37 mlrd qurady. 2019 jyldyń 10 aıymen salystyrǵanda, kórsetkish 34,3%-ǵa artty. Eksporttyń ósýiniń negizgi draıverleri aýyl sharýashylyǵy jáne AÓK (+17%), munaı óńdeý sektory (2,2 ese), metalýrgıa (+99,3%), avtomobıl jasaý (+28,3%) ónimderi boldy. Ózara saýda kólemin qysqa merzimdi kezeńde $5 mlrd deıin jáne orta merzimdi perspektıvada $10 mlrd deıin jetkizý mindeti qoıyldy.
Eki eldiń shekarasynda «Ortalyq Azıa» halyqaralyq ónerkásiptik kooperasıa ortalyǵyn qurý jobasyn iske asyrý boıynsha jumystar júrgizilýde. QR Premer-Mınıstri ónerkásiptik kooperasıa, sý energetıkasy, aýyl sharýashylyǵy jáne basqa da salalardaǵy Qazaqstan-Ózbekstan yntymaqtastyǵynyń joǵary serpinin atap ótti.
Qazaqstannyń Ózbekstanmen ózara is-qımylynyń joǵary deńgeıine tranzıttik kólik salasynda qol jetkizildi – temirjol ınfraqurylymyn – «Túrkistan – Shymkent – Tashkent» joǵary jyldamdyqty jolaýshylar magıstralin jáne «Darbaza – Maqtaaral – Jızaq» temirjol jelisin damytý, avtomobıl ótkizý pýnktterin jańǵyrtý jónindegi birlesken iri jobalardy iske asyrý jumystary júrgizilip jatyr.
Júkterdi tasymaldaý úshin qolaıly tarıftik saıasat qalyptastyryldy. Bıylǵy jyldyń 11 aıynda QR men ÓR arasyndaǵy temirjol tasymalynyń kólemi 22,7 mln tonnany qurady. Eki eldiń qorshaǵan ortany qorǵaý, sý jáne orman sharýashylyǵy salasyndaǵy yntymaqtastyǵy damýda. Birlesken kúsh-jigermen vegetasıalyq kezeńde Toqtoǵul jáne Qaıraqum sý qoımalarynan qosymsha sý aǵyzyldy, bul QR men ÓR aýyl sharýashylyǵy taýaryn óndirýshileriniń qajettilikterin qamtamasyz etti.
Aral teńiziniń ózekti ekologıalyq problemalaryn sheshý, búkil Aral mańynyń áleýmettik-ekonomıkalyq damýyn qoldaý boıynsha birlesken jobalar iske asyrylyp jatyr.
«Jyl qorytyndysy boıynsha biz aıtarlyqtaı nátıjelerge jáne mańyzdy ýaǵdalastyqtarǵa qol jetkizdik. Memleketterimizdiń basshylarynyń saıası erik-jigeriniń arqasynda Qazaqstan men Ózbekstan arasyndaǵy strategıalyq áriptestik damýdyń joǵary serpinin kórsetip otyr», — dedi A.Mamın.