Qazaqstan men Norvegıa arasyndaǵy dıplomatıalyq qarym-qatynasqa – 30 jyl!
Búgin, 6 maýsym – Qazaqstan-Norvegıa yntymaqtastyǵyndaǵy aıtýly kún – eki el arasynda dıplomatıalyq qatynastardyń ornaǵanyna 30 jyl tolyp otyr, dep habarlaıdy Almaty-akshamy.kz
Qazirgi tańda Qazaqstanda Norvegıa kapıtalynyń qatysýymen 17 kásiporyn jumys isteıdi. Elimizdiń ekonomıkasyna Koróldik tarapynan quıylǵan ınvestısıalar kólemi 164 mln dollar quraıdy.
Norvegıa – Qazaqstannyń Eýropadaǵy mańyzdy áriptesteriniń biri. Elimizdiń Syrtqy ister mınıstrligi taratqan aqparatqa sáıkes, tarıhı turǵydan qysqa merzim ishinde memleketterimiz arasyndaǵy syndarly saıası dıalog serpindi damyp, ózara tıimdi saýda-ekonomıkalyq yntymaqtastyq órisi aıtarlyqtaı keńeıdi.
Elderimiz halyqaralyq kún tártibindegi kóptegen máseleler boıynsha uqsas ustanymda jáne BUU, EQYU jáne basqa da halyqaralyq qurylymdar aıasynda tyǵyz yntymaqtastyqta. Eki memleket halyqaralyq qaýipsizdikti qamtamasyz etýge de eleýli úlesin qosýda. Atap aıtqanda, Koróldik Qazaqstanda Atom energıasy halyqaralyq agenttiginiń qamqorlyǵymen Tómen baıytylǵan ýran halyqaralyq bankin qurýdy qoldaǵan memleketter tobyna qosylyp, osy halyqaralyq bastamanyń donorlarynyń birine aınalǵan.
Eki tarap ekonomıkalyq yntymaqtastyqty odan ári keńeıtý maqsatynda keshendi jumystar atqarýda. 2021 jyldyń qorytyndysy boıynsha 85 mln. AQSH dollaryn quraǵan taýar aınalymyn jaqyn keleshekte eseleý jospary tur.
Taraptar arasyndaǵy mádenı-gýmanıtarlyq baılanystardy damytýǵa úlken mán berilgen. 2002 jyly IýNESKO men Norvegıa mádenı mura dırektoraty birlesip Tańbaly petroglıfterin meńgerý, saqtaý jáne tanystyrý jobasyn iske asyrǵan bolatyn. Nátıjesinde, 2004 jyly petroglıfter IýNESKO-nyń Búkilálemdik muralar tizimine engizildi.
Qazaqstan mádenıetin álemge pash etý jumystary aıasynda eki el arasyndaǵy yntymaqtastyq tarıhynda alǵash ret Abaıdyń tańdaýly poezıasy men «Qara sózderi» norveg tiline aýdarylyp, shyǵaryldy.
Eki eldiń úkimetteri áleýeti mol Qazaqstan-Norvegıa yntymaqtastyǵyn odan ári tereńdetý jáne ózara tıimdi áriptestiktiń jańa kókjıekterin ıgerý maqsatynda birlesken jumys aıasyn keńeıtýde.