«Qazaqstan Respýblıkasynyń Ulttyq Banki» RMÝ Almaty qalalyq fılıaly 2024 jylǵy 28 tamyzda «Qazaqstandy monetalar arqyly tany» serıasynan WORLD PAINTING koleksıalyq monetasynyń satylýy týraly habarlaıdy.
«Qazaqstandy monetalar arqyly tany» serıasynan WORLD PAINTING koleksıalyq monetasyn satý Ulttyq Banktiń https://kazcoins.nationalbank.kz ınternet-dúkeni arqyly júzege asyrylady, dep habarlaıdy aqshamnews.kz
WORLD PAINTING koleksıalyq monetalary týraly:
Qazaqstannyń halyqaralyq World Painting art-jobasyndaǵy fragmenti – Semeı polıgonynda ıadrolyq synaqtan zardap shekken sýretshi Káripbek Kúıikovtiń beıbitshilik qusy – kógershin sýreti men Ábilhan Qasteevtiń nemeresi, sýretshi Dáýren Qasteev salǵan záıtún aǵashynyń butaǵy moneta dızaınyna negiz bolyp otyr.
WORLD PAINTING moneta jobasy týraly:
Adamzatty biriktiretin týyndy. Halyqaralyq áleýmettik art-joba – álem elderi ókilderiniń qolynan shyqqan fragmentter mozaıkasynan turady. «Álem beınesi» bir qylqalamdy bir-birine berý arqyly eń kóp adam qatysqan óner týyndysy retinde Gınnes rekordyn ornatty.
Art-jobaǵa 200-deı elden 2070 adam boıaý izin qaldyrdy. Keneptiń uzyndyǵy – 4 metr, bıiktigi 1 metr 27 santımetr. Bul – jer sharynyń kishireıtilgen aýqymdaǵy parametrleri. «Álem beınesi» týyndysynyń kóshirmesi halyqaralyq ǵarysh stansıasyn da sharlap qaıtty.
Art-obekt – planetanyń barlyq turǵyny ultyna, násiline, dinine jáne turǵylyqty jerine qaramastan Jer betinde úılesimdilik pen kelisim ornaǵan beıbit ári berekeli ómirdi armandaıtynynyń aıqyn dáleli.
Kenepte Oljas Súleımenov, Dımash Qudaıbergen, Aleksandr Vınokýrov, Tımýr Bekmambetov, Nıkolá Sarkozı, Roı Djons, Baı Lıng jáne basqa da tanymal adamdar óz belgilerin qaldyrdy.
Monetalar:
- kúmisten jasaldy, synamasy – 925/1000. Túrli-tústi baspa tehnologıasy qoldanyldy. Moneta massasy – 62,2 gram, dıametri – 50 mm, daıyndaý sapasy – proof, nomınaly – 2 000 teńge. Monetalardyń taralymy – 300 dana.
Kúmis monetalardyń beınesi
MN 25 neızılber qospasynan jasaldy. Túrli-tústi baspa tehnologıasy qoldanyldy. Moneta massasy – 15 gram, dıametri – 33 mm, daıyndaý sapasy – brilliant uncirculated, nomınaly – 200 teńgelik. Monetalardyń taralymy – 5 000 dana.
Melhıor monetalardyń beınesi
Koleksıalyq monetalar Qazaqstan Respýblıkasynyń búkil aýmaǵynda ózderiniń belgilengen qunyna saı tólemniń barlyq túri boıynsha qabyldanýǵa, sondaı-aq eldiń barlyq bankinde bank shottaryna esepke alynýǵa, aýdarýǵa, usaqtalýǵa jáne aıyrbastalýǵa jatady.
Koleksıalyq monetalar Qazaqstan Teńge saraıynda daıyndaldy.
Paıdalanýshy úshin «Qazaqstan monetalary» mobıldi qosymshasy da jumys isteıtinin eske sala keteıik. Onda monetalarǵa qysqasha sıpattama berilip, serıalar boıynsha taqyryptyq bólimderge bólingen. Iaǵnı, QUB shyǵaratyn monetalar týraly aqparat tolyqtaı qamtylǵan. Jekelegen monetalar boıynsha beınerolıkterge, monetalardyń 3D-sýretterine, sondaı-aq tolyqtyrylǵan shynaıylyq elementterine silteme berilgen.
Mobıldi qosymshany PlayMarket pen AppStore dúkenderinen júktep alýǵa bolady