Til kýrstary, oqytý baǵdarlamalary, kınokórsetilimder: almatylyq volonterler túrli sala boıynsha turǵyndarǵa qalaı kómektesýde aqshamnews.kz
Almatyda 50 myńnan astam azamatty biriktiretin volonterlerdiń 30-dan astam iri uıymy bar. Jyl basynan beri olar 500-den astam is-sharalar men aksıalar ótkizdi. Bul týraly Óńirlik komýnıkasıalar qyzmetiniń alańynda Jastar saıasatyn damytý memlekettik qory basshysynyń mindetin atqarýshy, Almaty qalasy boıynsha volonterlar front-ofısiniń jetekshisi Baǵdat Anarbaeva aıtyp berdi, dep habarlaıdy
«Almaty qalasynda az qamtylǵandarǵa qamqorlyq jasaý, qorshaǵan ortany qorǵaý, muqtaj jandarǵa kómek kórsetý jáne t.b. sıaqty qyzmettiń ártúrli salalaryna arnalǵan uıymdar men bastamalardyń keń aýqymyn qamtıtyn baı jáne serpindi volonterlik qoǵamdastyq bar. Volonterler ártúrli baǵyttaǵy is-sharalardy ótkizedi. Bir volonterler ata-anasynyń qamqorlyǵynsyz qalǵan balalardy oqytsa, keıbiri jalǵyzbasty zeınetkerlerge arnalǵan pansıonattarda shyǵarmashylyq keshter uıymdastyrady, al basqalary janýarlarǵa nemese qorshaǵan ortaǵa kómektesedi», - dedi B.Anarbaeva.
Volonterler sońǵy sý tasqyny kezinde erekshe belsendilik tanytyp, zardap shekken aımaqtarǵa 592 tonna gýmanıtarlyq kómek jınap, jibergeni atap ótildi.
«Jıyn pýnktiniń jumysyna «Qamqor Charity», «Qazaqstan Eriktiler lıgasy», «Newman», «Teplo», «Halyq» sıaqty 30-dan astam iri qaıyrymdylyq qorlary men volonterlik uıymdar, 200-den astam volonterler men Radıoelektronıka jáne baılanys áskerı-ınjenerlik ınstıtýtynyń 100 kýrsanty tartyldy. Gýmanıtarlyq kómek jınaýdyń alǵashqy kúnderinen bastap úlken belsendilik pen alańdaýshylyq tanytqan Almaty qalasynyń turǵyndaryna alǵys bildirgim keledi», - dep atap ótti ol.
Jyly mezgilde qalanyń barlyq aýdandarynda volonterler otandyq fılmderdiń tegin kórsetilimderin uıymdastyrady. Sonymen, jazǵy maýsymnyń basynan bastap 10 000-nan astam adamdy qamtıtyn 40-tan astam ashyq aspan astyndaǵy fılmder kórsetildi.
Sondaı-aq, volonterler ata-anasynyń qamqorlyǵynsyz qalǵan balalarǵa arnalǵan kóptegen qysqa merzimdi oqytý kýrstaryn ótkizedi. Jyl basynan beri marketıń, qarjylyq saýattylyq, mobılografıa sıaqty baǵyttar boıynsha oqytý júrgizildi.
«Volonterlik qyzmet jeke jáne kásibı damý úshin jáne volonterlerdiń ózderi úshin tamasha múmkindikter beretinin atap ótken jón. Olar basqalarǵa kómektesip qana qoımaıdy, sonymen qatar kóshbasshylyq, komýnıkasıa, jobalardy basqarý daǵdylaryn damytady. Volonterlerdi jan-jaqty damytý úshin volonterlerdiń front-ofısi bazasynda júıeli negizde trenıńter, sheberlik synyptary men oqytý kýrstary ótkiziledi», - dep bólisti B.Anarbaeva.
Osylaısha, bıyl Almaty qalasy Tótenshe jaǵdaılar departamentimen birlese otyryp, volonterler tótenshe jaǵdaılar kezinde kómek kórsetý boıynsha oqýdan ótti. Barlyǵy 700-den astam volonter ártúrli baǵyttar boıynsha oqytyldy.
Qorytyndylaı kele, spıker megapolıste jaqyn arada «Igi ister marafony» bastalatynyn, onyń aıasynda túrli qaıyrymdylyq jáne eriktiler aksıalary uıymdastyrylatynyn habarlady.
Esterińizge sala keteıik, Almaty qalasyndaǵy volonterler front-ofısiniń qyzmeti Almaty qalasy Jastar saıasaty máseleleri basqarmasynyń qoldaýymen júzege asyrylady.