Memleket basshysy Qasym-Jomart Toqaev Halyqaralyq volonterler forýmynda volonterlerdi búgingi adamzattyń elıtasyna teńedi, dep habarlaıdy Almaty-akshamy.kz.
«Bul forým birlesken áreketter mańyzdy ról oınaıtynyn kórsetedi. Biz álemde buryn-sońdy bolmaǵan túrli problemalarǵa kezdesip otyrmyz. Sondyqtan qazir jarqyn bolashaqqa degen úmitti óshirip almaý úshin ymyrashyldyq óte qajet. Men halyqaralyq volonterlik baǵdarlamalar tıimdi ekenine jáne jeke tulǵalar arasyndaǵy dıplomatıany ilgeriletýge múmkindik beretinine senimdimin. Óz ómirin ózgelerge arnap júrgenderge, ásirese muny halyqaralyq deńgeıde istep júrgenderge alǵys bildirgim keledi. Óıtkeni olardy adamzattyń elıtasy, beıbitshilik pen meıiriminiń naǵyz elshileri dep aıtýǵa bolady», - dedi Qasym-Jomart Toqaev.
Prezıdent volonterlik qyzmetti ekologıalyq qundylyqtardy ilgeriletýge paıdalanýǵa bolatynyn atap ótti.
«Bolashaǵymyz baqýatty bolý úshin búgingi ár qadamymyzdy durys basýymyz kerek. Sondaı-aq, ekologıalyq tutyný mádenıetin ilgeriletý qajet. Ol úshin bizge adamdardyń oılaý tásilin, qorshaǵan ortany qabyldaý mádenıetin ózgertý qajet. Sonda ǵana reformalardyń nátıjesi ornyqty ári qaltqysyz bolady. Men volonterlik jeke adamdardyń úlgisi negizinde qalyptasatynyna senemin. Bizge jaýapty azamattyq jáne patrıotızm uǵymdarynyń negizinde damýdyń jańa paradıgmalaryn qalyptastyrý kerek. Elimizde volonterlik qyzmettiń keńinen taraýyna qajetti jaǵdaıdyń bárin jasaımyz», - dedi Memleket basshysy.