Bul - Syrtqy ister mınıstrliginiń resmı ókili Aıbek Smadıarovtyń pikiri.
Onyń aıtýynsha, Qytaımen vızasyz rejımge qatysty taraǵan pikir qate, dep habarlaıdy Almaty-akshamy.kz
Vızasyz rejım qaı elde bolsyn shetelden keletin týrıserdiń sanyn arttyrýǵa baǵyttalǵan.
Qazaqstan men Qytaı arasyndaǵy qatynasty jańa deńgeıge shyǵaratyn qujatqa qol qoıýǵa qarsy bir top belsendi qalyń jurtshylyqqa qate aqparat taratyp jatyr.
Onyń aıtýynsha, bul kelisim eki el arasyndaǵy qarym-qatynastardyń damýyna, azamattar arasyndaǵy baılanystarǵa, saýda-sattyqty keńeıtýge aıtarlyqtaı qoldaý bolady. Sondaı-aq ol qazirgi geosaıası jaǵdaıda Qazaqstan úshin neǵurlym kóp eldermen tyǵyz qarym-qatynas ornatý utymdy ekenin jetkizdi.
- Alaıda áleýmettik jelilerde Qazaqstan men Qytaı arasyndaǵy qatynasty jańa deńgeıge shyǵaratyn qujatqa qol qoıýǵa qarsy bir top belsendi qalyń jurtshylyqqa qate aqparat taratyp jatyr, – dep jazdy Aıbek Smadıarov.
Atalǵan jaǵdaıǵa baılanysty Syrtqy ister mınıstrliginiń resmı ókili kelisimge qatysty qosymsha aqparat berýdi jón kórdi.
Bul kelisimge qol qoısaq, Qytaı azamattary elimizge qaptap kiredi degen pikir shyndyqqa janaspaıdy. Sebebi byltyr shilde aıynan bastap Qazaqstan Iran, Úndistan jáne Qytaıdyń azamattaryna elge 14 kúnge deıin vızasyz kirýge ruqsat bergen. Ózderińiz kórip otyrǵandaı, atalǵan elderdiń, ásirese Qytaı azamattarynyń bizdiń kóshelerde qaptap júrgenin kórip otyrǵan joqpyz. Bul shara respýblıkamyzdyń ınvestısıalyq klımatyn jáne týrısik áleýetin arttyrý, sondaı-aq iskerlik baılanystardy damytý úshin jasalǵan. Ekonomıkalyq turǵydan bul bastama óziniń oń nátıjesin berip jatyr.
Elimiz ben Qytaı arasyndaǵy vızasyz rejım, eń aldymen, Qazaqstan azamattarynyń kórshi memleketke barýyna barynsha qolaıly jaǵdaı týdyrady. Eger buryn tek Qytaı azamattary bizge vızasyz 14 kúnge kire alatyn bolsa, bul kelisimnen keıin olar da, biz de bir-birimizge 30 kúnge deıin vızasyz bara alatyn bolamyz. Mysaly, Qazaqstan azamattary búginde vızasyz, lezde Túrkıa men Birikken Arab Ámirlikterine qydyryp baryp qaıtyp jatyr. Endi dál solaı Qytaıǵa da bir ǵana pasportpen baryp kelýge bolady.
«Vızasyz Qazaqstanǵa kelgen Qytaı azamattary elimizde qalyp qoıady, jumys oryndarymyzdy tartyp alady degen pikirler jańsaq. Óıtkeni vızasyz rejım tek týrısik jáne iskerlik saparlarǵa arnalady jáne jumys isteýge ruqsat bermeıdi. Qyzmet etýge bólek arnaıy jumys vızasyn aldyn ala rásimdeý qajet. Buryn Qytaıǵa barý úshin vızany ashý, konsýldyq alymdy tóleý, uzaq kezekte turý (keıde 2-3 aıǵa deıin), vıza rásimdeıtin arnaıy kompanıalardyń qyzmetine qomaqty aqsha tóleý kerek edi. Al vızasyz rejım engizilgennen keıin bul sharalardyń eshbiri qajet bolmaıdy. Vızasyz rejım qaı elde bolsyn shetelden keletin týrıserdiń sanyn arttyrýǵa baǵyttalǵan. Bul ekonomıkaǵa oń áser etedi. Óıtkeni elge kelgen týrıs mindetti túrde qonaq úıde turady, dámhana men meıramhanalarda tamaqtanady, kólik qoldanady, jalpy aıtqanda elde biraz aqsha jumsaıdy. Al qytaılyq týrıser álemde qaltaly týrıser sanyna jatady. Qoryta kelgende, vızasyz rejımnen qaýip joq. Biz budan paıda kórmesek, utylmaıtynymyz anyq. Álemniń ekinshi ekonomıkasy sanalatyn Qytaımen ózara tıimdi saıasatty júrgizý elimizdiń ulttyq múddesine tolyq saı keledi», – dep túıindedi sózin resmı ókil.