Byltyr mobıldik ınternet sapasyna qatysty 532 shaǵym túsken
Sıfrlyq damý, ınovasıa jáne aeroǵarysh ónerkásibi vıse-mınıstri Asqat Orazbek aýyl aımaqtardaǵy ınternet sapasynyń ne sebepti tómen ekenin túsindirdi, - dep habarlaıdy Almaty-akshamy.kz BAQ.KZ-ke silteme jasap.
«Byltyr mobıldik ınternet sapasyna qatysty 532 shaǵym tústi. Al bizdiń elde 26 mln túrli smartfon, birneshe kompúteri bar jeli qoldanýshylary bar. Statısıkaǵa qarap, ınternet sapasyna qatysty 532 shaǵymnyń az ekenin kóremiz. Jalpy, shaǵym barlyq aımaqta bar. Biz birqatar óńirdiń geografıalyq ornalasýynyń kúrdeli ekendigin túsinýimiz qajet. Ondaı óńirler – Qaraǵandy, Ulytaý oblystary, Qostanaı, Shyǵys Qazaqstan, Túrkistan oblystarynyń keı jerleri. Jer bederi kúrdeli bolǵan kezde operatorlarǵa ınternettiń qoldanystaǵy tehnologıalaryn jetkizý óte qıyn. Sondyqtan ol jerlerge ınternet spýtnık arqyly beriledi», - dedi Sıfrlyq damý, ınovasıa jáne aeroǵarysh ónerkásibi vıse-mınıstri.
Vıse-mınıstrdiń aıtýynsha, spýtnıkten berilgen ınternettiń sapasy tómen bolady.
«Búginde mundaı myńnan astam lokasıa bar. Bul lokasıalarda negeostansıonarly spýtnıktik tehnologıany paıdalaný arqyly qamtı alamyz. Bul tehnologıanyń trafık sapasy birshama jaqsy. Jalpy, ol turǵyny 200 adamnan aspaıtyn shaǵyn eldi mekenderdi sapasy jaqsy ınternetpen qamtý úshin jetkilikti», - dedi Asqat Orazbek.