Bul týraly brıfıńte Túrkistan oblysynyń SEBD basshysynyń orynbasary Bahtyoraz Elemesov aıtty, dep habarlaıdy almaty-akshamy.kz Túrkistan oblysynyń Óńirlik komýnıkasıalar qyzmetine silteme jasap.
«2024 jyldyń qyrkúıek aıynan bastap elimizdegi 11 jasar qyzdarǵa adam papıllomasy vırýsyna qarsy ekpe salynady. Jatyr moıny obyry aýrýynyń (JMO) damýyna «adam papıllomasy» vırýsynyń (APV) ınfeksıasy áser etedi. Al vırýsty juqtyrýdyń jáne onyń damýynyń aldyn alýdyń jalǵyz joly – ekpe saldyrý. Qazaqstanda osy dert boıynsha jyl saıyn 1 600-den astam jaǵdaı tirkelip, 500-den astam áıel qaıtys bolady. 2030 jylǵa qaraı 15 jasqa deıingi barlyq qyzdardyń 90%-y ekpemen qamtylmaq. Immýndaýdy alǵashqy medısınalyq-sanıtarıalyq kómek kórsetýge lısenzıasy bar zańdy tulǵalar júrgizedi. Aıta keterligi, qyz balalardy vaksınasıalaý - ata-analarynyń kelisimimen ǵana júrgiziledi»,- dedi Bahtyoraz Mızamuly.
Álemde «Adam papıllomasy» vırýsyna (APV) qarsy ekpe 15 jyldan astam ýaqyt boıy qoldanylyp keledi. Ekpe álemniń 125 elinde, sonyń ishinde Ózbekstan, Qyrǵyzstan, Tájikstan, Túrikmenstanda júrgizilip keledi. Odan bólek, Avstralıa men AQSH-ta ekpeniń áserinen áıelder arasynda «Adam papıllomasy» vırýsynyń taralýy 90%-ǵa tómendegen.