Jarys Býrabaı demalys aımaǵynda ótti
Maýsymnyń 22-si men 25-i aralyǵynda Býrabaı demalys aımaǵynda tas joldaǵy velosporttan el chempıonaty ótti, dep habarlaıdy Almaty-akshamy.kz Baq.kz-ke silteme jasap.
Munda elimizdiń eń myqty degen shabandozdary toptyq jáne jekeleı jarystar boıynsha Qazaqstan chempıony ataǵy úshin talasqa tústi.
Jarystyń sońǵy kúni Astana Qazaqstan Development Team jastar qurama komandasynyń shabandozy, Aleksandr Vınokýrovtyń uly Nıkolá Vınokýrov tas joldaǵy velosporttan 23 jasqa deıingi shabandozdar arasynda ótken Qazaqstan chempıonatynyń jeńimpazy atandy. Jarys Býrabaı demalys aımaǵynda ótti. Nıkolá 157,5 shaqyrymdyq qashyqtyqty 3 saǵat 44 mınýt 16 sekýndta júrip ótti. Ilhan Dostıev (+00:39) mirege ekinshi, Órken Slamjanov (+00:58) úshinshi bolyp márege keldi.
«Tańerteńgisin jeńiske jetem degen maqsatpen oıandym. Meni ekinshi nemese úshinshi oryndar qyzyqtyrǵan joq. Tek jeńiske jetýge bel baıladym. Jarys bastalǵanda kóshbasshylar tym alysqa uzap ketpeý úshin olardy baqylaýda ustaý kerek boldy. Bizdiń Soltústik Qazaqstan oblysy ekinshi aınalymda basymdyqty jaqsy saqtap qaldy. Shabýyl bastalǵanda men birinshi topqa qosyldym. Kúni boıy ózimdi jaqsy sezindim. Márege jeti shaqyrym qalǵanda sońǵy aınalymda aldyńǵy qatarda jalǵyz ekenimdi bilgende, márege deıin sońǵy 1,5 shaqyrym boıy joǵary qarqynmen júrdim. Gleb óte jaqsy shabýyl jasady. Biraq, ókinishke oraı, basqa shabandozdar ony qýyp jetip, márege úshinshi bolyp keldi. Aleksandr Semenov te óte myqty boldy. Komanda bolyp jumys istegenimizge jáne jeńiske jetkenime óte qýanyshtymyn», - dedi Nıkolá Vınokýrov Qazaqstan velosport federasıasynyń baspasóz qyzmetine bergen suhbatynda.
Sonymen qatar Astana Qazaqstan Team shabandozy Evgenıı Gıdıch Qazaqstan chempıonatynyń toptyq jarysynda jeńiske jetti. Gıdıch 157,5 shaqyrymdyq qashyqtyqty 3 saǵat 43 mınýt 48 sekýndta baǵyndyrdy. Qalǵan júldeli oryndardy da astanalyq shabandozdar ıelendi. Artem Zaharov márege ekinshi bolyp keldi. Ol jeńimpazdan bir sekýndqa ǵana qalyp qoıdy. Al Gleb Brýsenskıı chempıonnan eki sekýndqa artta qalyp, qola júldege ıe boldy.