Qazaqstannyń reprodýktıvti medısına qaýymdastyǵynyń prezıdenti, profesor Vácheslav Lokshın balalardy erikti vaksınalaýdyń qajet shara ekenin aıtady, dep habarlaıdy almaty-akshamy.kz QazAqparatqa silteme jasap.
«COVID-19 indeti áýelde, ásirese, egde jastaǵy adamdarda aýyr ótse, keıingi kezde balalardyń aǵzasyna da keri áserin tıgizýde. Balalar arasynda COVID-19 indeti árqalaı ótip jatyr. Aýyr jaǵdaılary da bar, «kavasakı sındromy» da kezdesip otyr, qan tamyrlardyń qyzmeti buzylýda. Sondyqtan óte tez beıimdelgish indettiń aldyn alatyn jalǵyz jol vaksınalaý bolyp tur. Budan álemdi vaksına ǵana qutqara alady», - degen maman búginde kóptegen elde balalar men 15-ten asqan jasóspirimderdi vaksınalaı bastaǵanyn eske saldy.
«Qytaıda tipti 3-ten asqan balalardyń bárin vaksınalap jatyr. AQSH pen Izraıl 12 jastan bastap vaksınalaýǵa kóshti. Bul turǵyda eshqandaı bir erekshe táýekel joq ekenin aıtý kerek. Óıtkeni qoldanylyp jatqan vaksına adam aǵzasynda synaqtan ótken. Onyń ishinde júkti áıelderge de salyndy. Jer sharynda ondaǵan myń bala vaksına qabyldap úlgerdi. Keıbir elderde osy jastaǵy balalardyń jartysy ekpe aldy. Árıne, vaksınasıa ata-analardyń ruqsatymen júrgizilýi kerek. Vaksına aýrýǵa shaldyqpaýdyń nemese aýrýdy ońaı ótkerýdiń jalǵyz joly ekenin túsiný kerek. Sondyqtan balalar men jasóspirimderdi erikti vaksınalaý óte qajet», - dedi Vácheslav Lokshın.