Bul ǵylymı túrde dáleldendi.
330 myń adam genine taldaý jasaǵannan keıin amerıkalyq ǵalymdar vegetarıandardyń ne úshin ósimdik negizindegi dıetany tańdaıtynyn anyqtady, dep habarlaıdy Almaty-akshamy.kz QazAqparatqa silteme jasap.
Kóp adamdar janýarlarǵa degen janashyrlyqtan nemese kómirtegi shyǵaryndysyn azaıtý sıaqty etıkalyq sebeptermen ósimdik negizindegi dıetaǵa aýysyp jatyr.
Biraq mundaı tamaqtaný júıesine degen qushtarlyq tuqym qýalaýy múmkin be? Amerıkalyq ǵalymdar osy suraqqa jaýap izdep kórdi.
Ǵalymdardyń aıtýynsha, ósimdik taǵamdaryn tańdaý bizdiń genetıkamyzǵa negizdelýi múmkin.
Soltústik-Batys ýnıversıtetiniń (AQSH) patologıalyq anatomıa kafedrasynyń profesory Nabıl Iasın bastaǵan zertteýshiler toby aýqymdy bıomedısınalyq derekter bazasyn taldady.
Olar 40 pen 69 jas aralyǵyndaǵy 5 324 vegetarıan men vegetarıan emes 329 455 adamnyń genomyn salystyrdy.
«Biz vegetarıandyqqa qatysy bar úsh gendi anyqtadyq. Taǵy 31 gen vegetarıandyqpen baılanysty bolýy múmkin», — dedi Iasın Euronews Next arnasyna.
Genetıkalyq nusqalardyń dıetany tańdaýǵa áser etý mehanızmderi metabolızmniń, fızıologıanyń jáne dám qabyldaýdyń ózara áreketin qamtıdy.
«Dıetalyq taǵamdardy tańdaý jáne tutyný dámdi qabyldaýǵa baılanysty» delingen zertteýde.