Qazaqstan Respýblıkasy Prezıdenti Ákimshiliginde Prezıdent kómekshisi Tamara Dúısenovanyń tóraǵalyǵymen Memleket basshysynyń 2024 jylǵy 2 qyrkúıektegi Joldaýyn iske asyrý barysy, onyń ishinde mektepke deıingi bilim berýde vaýcherlik qarjylandyrý mehanızmin engizý máselesi qaraldy, dep habarlaıdy aqshamnews.kz
Jobany tolyq engizý osy jyldyń 1 tamyzyna josparlanǵan.
Qazirgi tańda jobaǵa 2,3 myńnan astam mektepke deıingi uıym qatysýda jáne 276,5 myń balaǵa vaýcherler berildi.
Ótken jyly joba Taraz, Shymkent, Túrkistan jáne Oral qalalarynda synaqtan ótti, al aǵymdaǵy jyldyń basynan bastap Astana qalasynyń balabaqshalary, naýryz aıynan bastap Qaraǵandy, Semeı, Óskemen, Jezqazǵan qalalary jáne Jambyl oblysynyń Baızaq, Túrkistan oblysynyń Saryaǵash aýdandarynyń balabaqshalary jobaǵa qosyldy.
Vaýcherlik júıe artyqshylyqtary:
- Birinshiden, mektepke deıingi uıymdardyń qoljetimdiligi. Burynǵydaı konkýrs negizinde emes, bilim basqarmalary memlekettik tapsyrysqa ótinim berip, belgilengen talaptarǵa saı keletin balabaqshalardan Tizimdi qalyptastyrady.
- Ekinshiden, ádildik. Ata-analar memlekettik vaýcher alady jáne ony tizimge engizilgen kez kelgen balabaqshada qoldana alady. Bul ata-analarǵa tańdaý erkindigin beredi jáne balabaqshalardyń kórsetiletin qyzmet sapasyn arttyrýyna serpin bolady.
- Úshinshiden, sapany baqylaý. Balabaqshalardyń qyzmetin baǵalaýǵa degen jańa kózqaras engizildi. Bilim berý sapasyn endi ata-analar baǵalaıdy, bul sýbektıvtilikti joıady jáne qyzmet sapasyn arttyrady. Sonymen qatar, joba naryqqa jańa qatysýshylardyń kelýine jol ashady, bul básekelestikti arttyryp, sapany edáýir jaqsartady.
- Tórtinshiden, ashyqtyq. Qarajat endi balaǵa baılanysty bólinedi. Jergilikti organdardyń ár balabaqshaǵa memlekettik tapsyrys kólemin bekitýi joıyldy. Bala bir balabaqshadan ekinshisine aýysqanda, vaýcher de birge aýysady.
- Besinshiden, búdjet qarajatyn maqsatty ári tıimdi paıdalaný. Qarjylandyrý mektepke deıingi uıymdarǵa balalardyń naqty barýyna baılanysty júzege asyrylady, burynǵydaı tizim boıynsha emes.
Jańa júıeniń tıimdiligin pılottyq jobanyń aldyn ala qorytyndylary rastady. Pılottyq joba júzege asyrylǵan qalalarda kezek aıtarlyqtaı qysqardy, al keıbir qalalarda (Taraz, Túrkistan, Oral) balabaqshaǵa kezekte turǵan barlyq balalar ornalastyryldy.
«Óli jandardy», qaıtalanǵan jáne birneshe balabaqshada tirkelgen balalardy alyp tastaý esebinen jobany iske asyrý bastalǵaly 27 mlrd teńgeden astam qarajat únemdeldi.
Osy únemdelgen qarajattyń 25 mlrd teńgesi buryn kezekte turǵan balalardy ornalastyrýǵa, al 2 mlrd teńgesi jańadan kezekke turǵan, 2 jasqa tolǵan balalarǵa baǵyttaldy.
Kezdesý barysynda Shymkent jáne Qaraǵandy qalalaryndaǵy kezek máseleleri qaraldy. Sondaı-aq Ulytaý oblysynyń ákimdigine kásipkerlermen jańa mektepke deıingi uıymdardy ashý boıynsha jumys júrgizý tapsyryldy, bul kezekte turǵan balalardy qamtý máselesin sheshýge múmkindik beredi.