Parlament Májilisi Halyqaralyq ister, qorǵanys jáne qaýipsizdik komıtetiniń depýtattary Uly Otan soǵysyndaǵy Jeńistiń 80 jyldyǵyna arnalǵan áskerı sherýge qatysýshylardyń daıyndyq barysymen tanysý úshin Astana qalasynda ornalasqan dalalyq lagerge bardy, dep habarlaıdy aqshamnews.kz Qorǵanys mınıstrligine silteme jasap.
Dalalyq qosynda depýtattar Aıdos Sarym, Ermurat Bapı, Bolat Kerimbek, Maksım Rojın, Oljas Quspekov jáne «Qazaqstan ardagerleri» Aýǵan soǵysy ardagerleri qaýymdastyǵynyń tóraǵasy Baqytbek Smaǵul paradtyq eseptoptardyń komandırlerimen jáne áskerı qyzmetshilermen kezdesti. Qarýly kúshter Qurlyq áskerleriniń bas qolbasshysy general-maıor Mereke Kóshekbaev depýtattarǵa sherýge daıyndyq týraly jalpy aqparat berip, áskerı qyzmetshiler men kýrsanttardyń áleýmettik-turmystyq jaǵdaılaryn tanystyrdy.
Depýtattar dalalyq lagerdiń turmystyq jaǵdaıymen tanysyp, shatyrlarda temperatýralyq rejımdi, monsha keshenderin, medısınalyq pýnkter men turmystyq qyzmet kórsetý bólmelerin, sondaı-aq áskerı qyzmetshilerdiń tamaqtanýyn uıymdastyrýdy tekserdi. Olar sondaı-aq paradqa qatysatyn qarýly kúshterdiń ártúrli túrleriniń áskerı kıim úlgilerimen tanysty.
- Bıyl biz Jeńistiń 80 jyldyǵyn búkil elimizben birge atap ótemiz. Bul tarıhı oqıǵa bolǵandyqtan, paradqa daıyndyqty óz kózimizben kórý úshin keldik. Dalalyq lagerde jańa tıptegi shatyrlar ornatylyp, áskerı tehnıka paradqa daıyn. Eń bastysy, biz sarbazdar úshin barlyq jaǵdaılar jasalǵanyna kóz jetkizdik. Barlyǵy jospar boıynsha júrip jatyr, tek aýa raıy qolaıly bolsa eken, – dep atap ótti depýtat Aıdos Sarym.
Depýtattar Jeńis paradyna qatysýshylarǵa olardyń qyzmeti úshin alǵys aıtyp, sharanyń joǵary uıymdastyrýshylyq deńgeıde ótetinine senim bildirdi.
İs-shara sońynda Qarýly kúshter Ulttyq áskerı-patrıottyq ortalyǵynyń shyǵarmashylyq ujymy áskerı qyzmetshiler men depýtattar úshin konsert qoıdy. Áskerı ónerpazdar soǵys jyldaryndaǵy ánderdi oryndap, ortalyqtyń áskerı orkestri Astanada ótetin paradtyń mýzykalyq súıemeldeýdi qamtamasyz etetinin habarlady.